WILLEMSTAD - Miembro di frakshon di MAN den Konseho Insular Urvin Macaay, no ta satisfecho ku e desaroyo ku kosnan a tuma den e asuntu di ámtenar ku ta di mas den seno di gobièrnu. Ta kiko sekretario di Estado Ank Bijleveld sa, ku nos aki no ta na altura di dje? ta loke Macaay ta puntrando su mes.
Macaay a lansa vários pregunta den direkshon di gobièrnu riba e asuntu aki. T’asina ku durante un reunion públiko siman pasá di Konseho Insular, Urvin Macaay a lanta i presentá e proposishon di órden pa pone un punto nobo riba agènda, esta e konfushon ku ta reina kiko ta bai pasa ku e ámtenar, unabes e kambionan estatal drenta na vigor.
Motibu pa e konfushon aki ta e hecho, ku diputado di Asuntunan Estatal Zita Jesus-Leito te ku awor a sostené ku te ainda no por bisa nada pasobra tur kos lo dependé di e diseño di e aparato públiko pa e pais nobo ku yama Kòrsou. E kompania KPMG ta hasiendo e ehersisio nesesario pa yega na e aparato aki. Mester bisa si, ku diputado Jesus-Leito a anunsiá, ku e diseño lo tabata kla na mart di e aña aki. Kiko tabata e tardansa no ta muchu kla ainda, pero reportadamente e rapòrt lo keda presentá e siman aki. Promé ku tur esaki, tabatin deklarashonnan na vários okashon ku niun hende lo pèrdè trabou.
Loke a kousa strañesa ta un deklarashon algun dia pasá di sekretario di Estado Ank Bijleveld, kende a bisa den e korant De Volkskrant ku tur ámtenar ku ta di mas, mester bai kas, unabes e entidatnan nobo bira un hecho.
Hustamente esei Macaay kier a haña klaridat riba dje.
El a bisa, ku e ta haña masha straño, ku un sekretario di Estado ulandes, ta bin mete ku un kos asin’aki. Esei ta nifiká, ku e mester sa algu mas, ku nos no sa, segun Macaay.
E konsehal a kòrda tambe kon tempu ku Ank Bijleveld a bisa ku e fecha di 15 di desèmber 2008 pa Kòrsou haña su status outónomo den Reino, no ta un fecha faktibel mas, kon diputado Zita Jesus- Leito a sali bisa ku esei no tin niun base i ku pa Kòrsou, ta desèmber 2008 ta sigui konta.
“E istoria, nos tur sa kaba. Diputado Jesus-Leito mester a rekonosé despues ku e no tabatin rason, ku e fecha no ta realista i ku Bijleveld a logra konvensé tur hende tòg. Ta e tipo di kosnan aki ta duna miedu i ta krea preokupashon,” Macaay a bisa.
El a bisa ku e ta spera ku pronto lo bin klaridat den e asuntu aki, prinsipalmente pasobra e ámtenar no ta trankil, tanten ku e bèrdat no subi mesa.