WILLEMSTAD - Federashon Biyar Kòrsou su Kampionato Nashonal di Ekipo pa Bola 8 ta den su kulminashon.
Despues di a inisiá dia 6 di aprel e kampionato ta yegando su fin di temporada regular. Despues di dos buèlta 6 ekipo ta luchando pa bai "Calle 6" pa saka e kuaternan ku ta bai playoff.
E posishon di tabla aktual den e fase final aki ta realmente pèrèmpèmpèn.
The Scorpions i Maishi Tigers tin mesun tantu wega ganá i pèrdí pero pa motibu di averahe di wega ganá e Skorpionnan ta na promé lugá.
CUB Sharks i The Biesheuvel Friends tambe ta den un lucha tenas pa kaba na di 3 lugá pero den kualke pifio di e dos nan ariba nan tambe ta para tras di porta pa subi e posishonnan di honor.
Pero realmente e bataya ta kayente den skina di e di 5 puesto, esaki ta e "hot seat".
Kaminda The Predators, Hoi Bao Titans i Boca Stars ta hibando un kampaña
fuerte di wega pa no pèrdè niun paso esaki por resultá ku e ekipo ta pafó di “Calle 6” i playoff. Aunke Curacao Warriors i Straigth Eight no a stòp di hasi orashon pero nan destinashon ta den man di otro.
Nan ta dependé hopi di resultadonan di e otro ekiponan.
Tur esakinan ta ingredientenan ku ta hasi e kulminashon aki unu sumamente elektrisante i ta pone kada un ekipo bai tur ku tin pa gana nan delaster enkuentronan.
Faltando 4 rònt di wega e desishon pa sa ken ta yega “Calle 6” por ta mas serka ora ku awe djamars 8'or ta bai tin 3 wega interesante.
Awe djamars ta bai tin kandela riba e mesa bèrdè ora ku ekiponan topa ku otro.
Maishi Tigers ta enfrentá Hoi Bao Titans den un revancha di e promé buèlta kaminda e Titannan di Hoi Bao a fulminá e kampionnan di tur tempu un derota di 5-4 den e promé buèlta.
The Biesheuvel Friends ta enfrentá e muchanan di Boca Sami esta Boca Stars ku ta buskando klasifikashon i amigunan di Biesheuvel ta buska pa pasa CUB Sharks yega e di 3 puesto.
Tur e dos enkuentronan aki ta tuma lugá na Pool Plaza banda di Bright Impex riba Gosieweg.
E otro wega interesante ta ora e aktual number 1, The Scorpions topa ku e number 9 esta Straight Eight na Breakpoint Pool Plaza na Granbeeuw.
E kapitan di Straight Eight, Alex Vieira, a laga sa ku e ta bin duru aden pa pone un stèmpel riba e kampionato dor di gana e number 1.
E djamars aki un dia promé ku dia di Himno i Bandera por bòltu kashaka riba e posishon di tabla.
Un i tur fanátiko di Biyar ta keda invitá pa presensiá e enkuentro nan aki di FeBiKo su Kampionato di Ekipo 2008.
FeBiKo ta deseá e pueblo di Kòrsou un felis dia di nos dushi Himno i Bandera.

Tabla di posishon: (Gana, pèrdí, set gana, set pèrdí total wega hunga)
1 THE SCORPIONS 9 2 50 29 11
2 MAISHI TIGERS 9 2 50 34 11
3 CUB SHARKS 8 4 51 41 12
4 THE BIESHEUVEL FRIENDS 6 4 43 33 10
5 THE PREDATORS 6 6 50 40 12
6 HOI BAO TITANS 5 5 34 37 10
7 BOCA STARS 4 7 34 43 11
8 CURACAO WARRIORS 2 10 38 54 12
9 STRAIGHT EIGHT 1 10 19 54 11