WILLEMSTAD - Nada no a kambia den e proyekto di Jan Thiel Bay Destination Resort pero ta trata di e mesun proyekto ku a kuminsa kuné na aña 2000. Asina desaroyadó di proyekto, Eduardo Halabi, a splika. E úniko kos ku ta deseabel aktualmente ta maksimalmente 1,5 porshento di e área di naturalesa na frontera di Jan Thiel.
Na aña 2004 Jan Thiel Bay Destination Resort a tuma e tereno bèk, for di APNA, despues di a entreg’é na APNA, pasobra el a keda drumi tres aña sin ku ningun hende a hasi algu kuné. “Ketu bai ta trata di e mesun proyekto ku e mesun hende envolví”. Debí na kompromisonan, Eduardo Halabi no ta pèrmití ainda pa divulgá nòmber di e invershonistanan. Loke ku sí Halabi por indiká, ta ku ta trata di invershonistanan di bon fama mundial i ku e finansiamentu pa e proyekto ta rònt.
Ta trata di un invershon di 116 mion dollar den e hotèl i 150 mion dollar adishonal den kondominio alrededor di e hotèl.
Ademas e hotèl ta krea trabou pa mil persona dirèkt i indirekt. Banda di esei, mil persona lo haña trabou den e parti sekundario, ku ta suma un total di 2 mil persona ku lo ta empleá den e proyekto denter di 5 pa 6 aña.
Entretantu, segun e splikashon di Eduardo Halabi, a surgi un retraso den e proyekto ku ta práktikamente kla pa kuminsá, debí na e diskushonnan ku a surgi enkuanto un pidi chikí for dje ‘tereno di naturalesa’ ku e proyekto lo ta deseá di haña adishonalmente.
Debí na algun aspekto tékniko, e proyekto tin nesesidat di mas tereno.
Esei ta nifiká ku mester trese sierto ahuste, pasobra no a tene kuenta ku e asuntu aki den pasado.
Aspekto ambiental
Halabi ta hopi konsiente i preokupá ku importansia di medio ambiente, meskos ku hendenan rondó di dje, pa evitá ku nos kalidat di bida ta bira difísil.
Ta p’esei ta di lamentá, segun Halabi, ku den e stadio ku e proyekto ta, unda ku ta kla pa kuminsá, ainda mester papia riba tres repi di tereno. Ta trata di tres pida tereno relativamente chikí. No tin ningun kuestion, segun Halabi, di kambiamentu di e área di konservashon den un área turístiko.
E área di naturalesa na Jan Thiel ta midi 300 hèktar, miéntras ku e terenonan ku e proyekto di Halabi ta pidiendo, ta di te ku maksimalmente 1 porshento i mei di e área di naturalesa.