BOGOTA, Colombia, - E gobièrnu di Colombia ayera a konfirmá ku a outorisá entrada di dos delegado europeo pa nan tin enkuentro direkto ku Sekretariado di FARC, ku e meta pa diskutí posibel liberashon di e personanan sekuestrá.
“E dos delegadonan europeo den último dianan a drenta Colombia, i nan a pidi gobièrnu outorisashon pa desplasá bai e enkuentro direkto ei ku Sekretariado di FARC”, e sekretario di prensa di Casa de Nariño, César Mauricio Velásquez, a bisa.
E funshonario no a spesifiká si e enkuentro ya a tuma lugá, tampoko no a duna nòmber di e delegadonan.
Oranan promé, medionan lokal a indiká ku delegadonan di Fransia i di Suisa a reuní den serunan ku hefe máksimo di “Fuerzas Armadas Revolucionarias de Colombia” (FARC), Guillermo León Sáenz, alias “Alonso Cano”, òf ku miembronan di e Sekretariado di e gueria.
Esaki lo bai ta e promé kontakto ku e hefe nobo di FARC ta aseptá ku delegadonan internashonal despues di morto di e lider históriko di e gueria, “Manuel Marulanda”.
Medionan di komunikashon colombiano a bisa ku na e supuesto enkuentro aki lo a asistí Noel Saenz, delegado di Fransia, i Jean Pierre Gontard, di Suisa.
E korant El Tiempo a informá ku un fuente di Casa de Nariño (e kas di gobièrnu) a indiká ku e dos diplomátikonan lo pidi FARC pa aseptá e proposishon di un zona di enkuentro pa inisiá diálogonan relashoná ku un eventual interkambio humanitario.
E gobièrnu colombiano ta manteniendo su postura di ku e sitio di enkuentro mester ta alehá fo’i zonanan poblá.
Ademas e guerieronan ku yega n’e lugá determiná mester ta desarmá.
Otro kondishonnan di e gobièrnu ta ku e enkuentro mester tin un plaso definí i opservadónan internashonal mester ta presente.
FARC a deklará di ta dispuesto pa realisá un interkambio di mas o ménos 40 persona sekuestrá, entre nan e eks kandidata presidensial Ingrid Betancourt, tres merikano, i vários polítiko, polisnan i miembronan di Ehérsito colombiano, pa mas o ménos 450 rebelde presu.