PARIS, Fransia, - Ku preteksto di lucha kontra eksplotadónan ku ta faboresé imigrashon klandestino, presidente franses Nicolas Sarkozy a primintí fortalesé e arsenal legal i represivo di Union Europeo (UE) durante e seis lunanan ku Fransia lo ehersé presidensia di e bloke, kuminsando awe.
Pero e polítika aki, anunsiá den un mensahe televisá di un ora, a keda denunsiá pa kombèrtí Europa den un “bùnker separá fo’i sobrá di mundu”.
“Esnan ku no tin papel no por keda”, Sarkozy a afirmá durante un intervenshon televisá di un ora, durante kua el a detayá su metanan i a diseñá un Europa kada bia mas será pa imigrashon.
“Mi ta resistí enrikesé esnan ku ta eksplotá e miseria humano”, Sarkozy a afirmá.
“Durante añanan no ta’tin niun kòntròl, i esaki a enrikesé esnan ku ta eksplotá miseria di hendenan pober”, e lider franses a añadí.
“Fransia, òf Europa no ta bai aseptá tur miseria di mundu”, Sarkozy a bisa ayera, sitando un ekspreshon di promé minister franses Michel Rocard.
Na 1990, Rocard a bisa un frase similar, pero el a agregá ku Fransia mester “sa asumí fielmente su responsabilidat” den tema migratorio.
Segun diferente fuente, e plannan franses pa UE lo por iritá mas e paisnan latinoamerikano, ku ainda ta protestá e ekspulshon di estranheronan sin papel.
Sarkozy ke kombèrtí Europa den un “bùnker separá fo’i sobrá di mundu”, Jean-Pierre Dubois a denunsiá, kende ta presidente di Liga di Derechonan Humano, ku, manera hopi otro, ta konfia ku e ideanan no ta prosperá.
E proyekto ta práktikamente un di e medidanan apliká pa e gobièrnu franses fo’i dia ku Sarkozy a yega palasio di Eliseo, na mei 2007.
E pakto aki, ku lo bai keda presentá ofisialmente na e 27 miembronan di UE 7 di yüli na Cannes.