WILLEMSTAD - Ku un akto seremonial simpel, Servisio di Agrikultura, Krio di Bestia i Peskeria (LVV) a hasi entrega ofisial ayera tardi di e “slipway” na piskadónan di Boca Sami. Ku e “slipway” aki, e piskadónan tin mas fasilidat pa atendé ku nan boto.
Un “slipway” ta e konstrukshon di betòn ku ta sirbi pa tantu baha e boto komo saka e boto for di laman.
Mester bisa ku tabatin un pista kaba ku tabata sirbi komo “slipway” pero tabata nesesario pa ekstendé esaki.
A ekstendé e pista ku 9 meter, segun Pablo Burgos, kolaboradó di maneho di LVV a duna di konosé.
E proyekto tabata den man di e kontratista Curacao Industrial Diving i a kosta alrededor di 150 mil florin.
En realidat piskadónan tabata hasi uso di e slipway” pa algun dia kaba, pero ayera tabatin e inougurashon ofisial.
E proyekto a ser konstruí ku un base hopi sólido: a usa plachi di heru basta fuerte komo fundeshi di e pista.
Ainda falta algun detaye pa finalisá e trabou na e “slipway”, trabounan ku lo tuma lugá riba término kòrtiku.
E piskadónan tabata kontentu ku e trabou. “Pempi” Constancia, un dje piskadónan konosí na Boca Sami tabatin palabra di elogio pa gobièrnu, pa e forma ku a atendé e proyekto.
E proyekto ta forma parti di e programa di gobièrnu di Kòrsou pa drecha playanan di piskadó aki na Kòrsou.
Manera ta konosí, resientemente a hasi entrega di e playa di piskadó na Rif, kaminda a hasi e laman mas hundu. Esaki ta pone ku piskadónan no tin nodi di warda ora awa ta haltu pa nan sali òf drenta ku nan boto.
Algun siman pasá, a entregá e pir kompletamente renobá na Kurá Buriku na kaminda pa Fuik, kaminda piskadónan awor por mara nan boto sin problema.
Asina tin mas proyekto ku ta na benefisio di e piskadó ku ta kuadra ku e filosofia di gobièrnu pa fasilitá e piskadó pa asina e por hasi su trabou mas kompleto posibel.