WILLEMSTAD, - Servisio Arbeidszorg (DAZ) ta trahando duru pa eliminá e retraso ku tin den otorgamentu di pèrmit na persona i kompanianan ku a hasi un petishon pa esei. Ta bon pa bisa si, ku no tin un retraso di 3 mil petishon den dunamentu di pèrmit, asina Christina van der Biezen, hefe apuntá temporalmente enkargá ku reorganisashon di DAZ, a anunsiá ayera tardi durante un enkuentro ku prensa.
LA PRENSA resientemente a dediká hopi atenshon na e problemátika aki, tambe den relashon ku e kòntròl ku outoridatnan ta ehersiendo último tempu pa determiná si tin empresa ku ta empleado trahadó ilegal.
Christina van der Biezen, ku algun luna pasá a keda apuntá pa remplasá Randolph “Dois” Gijsbertha pa trese un kambio den e rumbo ku e servisio tabata bayendo.
Van der Biezen a bin ta traha duru riba e situashon ku el a haña, asina el a indiká.
El a bisa ku tin diferente aspekto di maneho ku e servisio ta trahando riba dje aworakí pa drecha produkshon di DAZ.
Un dje kosnan ku ta traha riba dje ta e parti di outomatisashon. Unabes ku esaki ta tras di lomba – e ta kanando den bon direkshon – lo hasi posibel pa duna servisio di otorgamentu di pèrmit muchu mas rápido.
Tambe t’asina ku DAZ ta trahando riba institushon di un “Client Service Center”. Un sentro asina’ki, segun Van der Biezen, tin bentaha tantu pa e kliente komo pa e trahadónan di DAZ mes. E ta nifiká ku e kliente ta haña servisio den un ambiente muchu mas agradabel miéntras ku pa e empleado mes, e ta nifiká un adelanto den su forma di traha.
“Nos ta hopi leu ku e proyekto aki. Asina nos haña aprobashon di Bestuurscollege, nos lo kuminsá ku e fase di ehekushon,” segun Van der Biezen a indiká.
Tur kambio i mehoransa ku DAZ a introdusí te ku awor, tabata riba su propio fòrsa, ku su hendenan aktual, asina e hefe interino a aksentuá. El a bisa ku esei sinembargo no ta nifiká ku e kantidat di hende ku tin ta sufisiente. Nos tin un kantidat di vakatura aworakí ku nos ta konsiderá importante pa yena, di manera ku den futuro mester buska mas hende, el a anunsiá.
Un punto hopi positivo ta ku a logra haña un hurista pa sostené DAZ den su trayekto di kambio. Ku sosten di e hurista aki, DAZ lo bai revisá tur lei pa asina hasi e trabou i e resultado mas transparente, el a bisa.
E di 4 punto ta e proseso di trabou.
Van der Biezen a kuminsá ku refutá e publikashon den sentido ku lo tin mas ku 3 mil pèrmit di trabou pegá na DAZ.
“Mester hasi un distinshon entre e tipo di pèrmit. Nos ta haña petishon pa petishon nobo pa trabou, petishon pa alargá pèrmit eksistente, tin petishon pa hasi kambio di doño di trabou i finalmente bo tin tambe e loke nos ta yama prosedura aselerá pa haña pèrmit di trabou. E último aki ta konta partikularmente pa kompanianan grandi ku tin nesesidat urgente pa trahadó. Nan ta eksigí pa nos ta lihé den prosesamentu di nan petishon. Dos ehèmpel di e kompanianan aki ta Refineria Isla i tambe CDM,” Van der Biezen a splika.
El a bisa pa kuminsá t’asina ku e kantidat ku tabatin pegá ta 2853 petishon. Entretantu t’asina ku a eliminá un parti grandi di e retraso. A logra baha e kantidat ku 37 porshentu i e kantidat ku tin aworakí ta algu mas ku 1700 ku mester prosesá. I ta bin aserka ku petishonnan nobo nos ta atendé mesora, el a agregá.
Importante ta pa menshoná ku den e kantidat di petishon atrasá, bo ta haña di tur e kategoria ya menshoná, segun Van der Biezen.