WILLEMSTAD, - Refineria Isla ta bai tuma medida pa redusí polushon ku sigur un 30 porshentu, kompará ku loke tin aworakí. Esei abogadonan di e refineria a splika Korte ayera durante tratamentu di e kaso en kuestion.
E kaso ta kontinuashon di un lucha ku habitantenan den e área pabou di e instalashonnan aki ta hibando pa basta tempu kaba pa pone e refineria kumpli ku normanan di medio ambiente.
Anteriormente, e mesun Bijleveld aki a bisa enfátikamente ku e senario kaminda ta sera e refineria mester subi mesa komo un senario hopi serio i realista, si resultá ku Refineria Isla no por kumpli ku loke ta spera di dje i loke por sierto e mes a bai di akuerdo di lo kumpli kuné.
E kaso ayera a bolbe pone dede riba e herida, esta ku e refineria ta kousando un polushon ku ta inaseptabel.
E preshon riba Refineria Isla i riba gobièrnu di Kòrsou pa pone Refineria Isla kumpli ku stipulashonnan den su pèrmit di molèster pa loke ta norma d medio ambiente, kada dia ta birando mas grandi.
Manera nos a publiká djasabra último, sekretario di estado Ank Bijleveld a menasá entretantu ku si Kòrsou no kumpli, mester paga bèk e montante ku Hulanda a pone disponibel pa kumpra aparato pa garantisá un medio ambiente sano.
Abogado Sandra van het Veld a konfirmá den un entrevista na Radio Nederland Wereldomroep ku Isla a primintí ku e ta bai tuma medida.
Pero mester bisa ku no ta aworakí ta halando atenshon di e refineria ku kos no por sigui asina’ki, el a bisa.
Segun Van het Veld, por a hasi algu mas ku 10 aña pasá kaba.
El a bisa ku ta masha straño, ku awor di ripiente Refineria Isla ta anunsiá ku por redusí polushon. Esei ta pone nos asumí e aktitut ku nos mester mira, promé ku nos kere, el a agregá.
E kaso di ayera tin e karakter di un huisio sumario pero e ta andando mas ku 6 luna kaba. Nos ta spera ku pronto lo tin un sentensia, segun e abogado.
El a bisa ku di tur manera e ta kontentu, pasobra e refineria a hasi e promesa i a komprometé su mes pa hasi algu promé ku fin di e aña aki. I loke el a primintí, ta di baha polushon ku 30 porshentu.
E punto ta ku e refineria simplemente mester mantené su mes na e pèrmit di molèster ku el a haña. Den e mesun pèrmit aki ta para porsierto ku mester revisá e pèrmit aki despues di 5 aña. Revisá e pèrmit no ta pará lòs di e kaso aki, el a agregá.