Konkurso pa mira kua bario ta sali esun mihó den selebrashon

WILLEMSTAD – Komishon Selebrashon Dia di Bandera e aña aki a opta pa promové selebrashon di Dia di Bandera di un forma mas profundo den nos barionan. Huntu ku Servisio pa Kultura i Edukashon a logra trese un inovashon di sumo importansia.
Den e kuadro aki a skohe pa introdusí un konkurso entre barionan pa mira kua bario ta sali esun mihó den selebrashon di Dia di Bandera. Alabes ta spera ku e aktividatnan aki lo surti komo resultado ku ta alsa nivel i kalidat di selebrashon di dia di bario en general i otro eventonan kolektivo en partikular.
Manera ta konosí a bira tradishon ku despues di e aktividatnan ofisial ku ta tuma lugá riba Plasa Brion, tin algun bario ku pa algun aña ta okupando nan mes ku e tarea importante aki di brinda aktividatnan ku ta yama i kapta atenshon di un públiko grandi. Te ku awor gobièrnu tabata sostené algun di e barionan aki finansieramente.
Ta trata aki di barionan ku ta brinda aktividatnan di un karakter sosial kultural ku ta kuadra ku e evento tan importante aki. Por menshoná Fundashon Adelanto Rooi Santu (den e bario Rooi Santu), Bisiñanan Kontentu den Bònt (konsentrando den e área di Bònt / P.L. Jansenstraat-Oranjestraat), na Kas Grandi e área rondó di e kompleho deportivo i Barber Parke Himno i Bandera .
No opstante e aktividatnan aki, Komishon Selebrashon di Dia di Bandera ta di opinion ku e aktividatnan di Selebrashon di Dia di Bandera ainda ta poko; komo tal a yega na e konklushon ku mester hasi mas esfuerso pa krea otro aktividatnan espektakular rondó di e suseso tan esensial aki. Bandera ta un símbolo nashonal masha importante mes.
Ta nesesario probechá pa lanta nos forma en general di atendé ku e tipo di eventonan aki. Ademas mester sigui hasi tur loke ta na nos alkanse pa plama e interes pa selebrashon di Dia di Bandera den práktikamente tur skina di Kòrsou. Komo tal ta komprendibel ku barionan ta keda konsiderá komo un di e ángulonan mas apropiá pa promové mas komprenshon pa bandera.
Promoviendo amor pa pais, mas aserkamentu entre siudadanonan di e teritorio aki, e sentido di patriotismo i un nivel haltu di sivismo ta algu ku por keda aselerá atraves di kompetensia sano entre barionan. E konkurso aki entre barionan ta tuma lugá pa promé biaha i ta konta ku 4 partisipante, esta e barionan Montaña, Bou di Barber Lelienberg 148, Brievengat na Sentro di bario i Double Light Skooter Team (for di stadion di Ref).
E barionan partisipante lo keda huzgá riba aspektonan manera kon ta duna kontenido na selebrashon di Dia di Bandera, komo tal ta averiguá e grado di kreatividat ku ta hinka den e evento, profundidat, forma di apelá na historia i esfuerso pa konsientisá pueblo.
Tambe e hurado ta tira un bista riba e kalidat organisatorio, komo tal ta duna punto tambe pa limpiesa i kuido di medioambiente, seguridat, variedat den e aktividat, konsentrashon riba kuido i promoshon di salú.
Ademas e hurado ta duna importansia na e nivel síviko, partisipashon di bario, ambiente i asistensia di públiko ku e bishita na e evento aki. E ganadó lo risibí un suma di plaka na efektivo di 3000 florin i lo keda anunsiá dia 3 di yüli. Komishon Selebrashon Dia di Bandera ta deseá tur partisipante tur sorto di éksito i ta spera ku esaki lo ta komienso di algu grandi pa Kòrsou.