WILLEMSTAD – Minister Omayra Leeflang ta entregá keho kontra un matutino ku ayera a hasi publikashon pornográfiko pa informá su lektornan riba loke ta tumando lugá riba Internet. Na promé lugá minister Leeflang ta kere ku no tabata nesesario pa e korant enkuestion usa un kantidat grandi di pòtrèt pa duna informashon ku tin publikashonnan pornográfiko ta tuma lugá riba Internet. Minister Leeflang ta kere ku pa awor aki un i tur sa kiko ta pasa riba Internet i ku no mester a kompañá e relato aki ku e tipo di pòtrètnan asina pa duna publisidat na esaki.
Di otro banda e ta kere ku e korant a violá privasidat di e personanan ku a keda publiká. Den un komunidat chikitu inkluso ku bo tapa kara di un persona, esaki lo ta fásil pa identifiká, motibu pa kua e ta kere ku e korant a bai demasiado leu ku e asuntu aki. Mirando ku e asuntu ku no tin lei di media ta keda e úniko kaminda ku e por kana ku ta via di Ministerio Públiko ku lo por tuma un desishon den e asuntu aki. Tabata pa evitá tipo di iregularidatnan a presentá den pasado e regulashon di media, den kua kada medio di komunikashon mester tene su mes na dje.
E loke a tuma lugá ayera ta produsí fotonan pornográfiko bou di kapa di informashon i no ta nesesario pa pone pòtrètnan pa splika kiko ta pasando. Mira kuantu wepsait ku pòtrètnan pornográfiko ku inkluso no ta hendenan lokal. Minister Omayra Leeflang ta opiná ku te na ora tabata deseá pa ilustrá por a usa un pòtrèt so. E strategia ku promé página, paden i patras ta demostrá e meta pa e media bende i nada mas. E ta opiná ku esaki ta pasa ora bo komunidat tin asina tantu medio di komunikashon i ku por mira ku no tin espasio pa mas korant i komersialmente esaki a keda demostrá.
E asuntu aki lo por a keda evitá ku si awe tin lei di media, ya ku esaki tabata un di e metanan ku mester logra publikashonnan sano i konfiabel den medionan di komunikashon. Komo minister sigur lo no por hasi nada kontra un publikashon asina, motibu pa kua ta hinka e asuntu aki den mas di otronan pa sigui atendé esaki den un forma konfiabel. Ministerio Públiko mester disidí kiko nan lo bai hasi, pero kuestion ta ku a denunsiá e publikashon aki na Ministerio Públiko, sperando ku lo bai tin un okashon pa ku esaki den su totalidat.