ORANJESTAD - Aña pasa Sr. Milton Berlinski a establece un beca di cuater aña pa un total di 16 mil dollar cu Aruba Scholarship Foundation lo administra.
E beca Sabina Berlinski Memorial Scholarship ta honra memoria di mama difunto di Sr. Berlinski.
Siman pasa e Selection Committee di Aruba Scholarship Foundation a evalua e peticionnan pa ayudo financiero pa aña escolar 2008 – 2009 y unanimamente e comite a selecta Srta. Maylin Dijkhoff pa ricibi e beca. Maylin ta studiante di Business Administration na Miami Dade Community College. Despues cu e caba su Associate Degree, Maylin ta bay specializa den Finance.
Ora cu e ta na Aruba e ta traha na Caribbean Mercantile Bank pa spaar pa su estudio.
Sabina Berlinski tabata un persona hopi conoci na Aruba pero bou nomber di Soybel. Soybel a nace na Brazil, su casa Leonard “Leo” Berlinski a bin di Polonia. Nan a establece e joyeria Pearl of the Orient na San Nicolas y despues a habri un sucursal den Nassaustraat na Playa.
Leo y Soybel tabata hopi activo den organizacionnan civico y caritativo. Pa hopi aña nan tabata tuma parti den actividadnan di Lions Club. Leo tabata miembro di Logia Masonico “EL Sol Naciente” mientras cu Soybel tabata un di e prome miembronan di e otro organizacion masonico “Order of the Eastern Star.”
Hopi hende ta recorda Leo como miembro di SAC y Soybel como participante den tur actividadnan di carnaval. Den su ultimo añanan Soybel a funda Organisashon Parkinson Aruba (OPA) pa yuda duna alivio na esnan cu ta sufri di e malesa teribel aki y nan famia.
En total e matrimonio di Leo y Soybel Berlinski a produci seis yiu: Leonard (Lennie), Beulah, Gilbert, e gemelonan Michael y Milton y por ultimo Deborah.
Aruba Scholarship Foundation ta hopi agradecido y ta aplaudi Sr. Milton Berlinski pa su gesto bunita y generoso.
Nos ta spera cu otronan cu tin e recurso por sigui e bunita ehempel di Sr. Berlinski pa conmemora un ser keri cu un beca cu lo yuda nos hobennan den necesidad bay sigui nan educacion avansa.
Pa mas informacion tocante Aruba Scholarship Foundation contact su president na clydeharms@setarmet.aw.