MALMOK- E di 22 edicion di e conocido “Aruba Hi-Winds”, lo tuma lugar e aña aki, cumninzando 2 di Juli, y lo dura te cu dia 7 di Juli, cu ta dialuna otro siman.
Manera ya a bira un tradicion, e competencia aki lo tuma lugar na e conocido sitio di Fisherman’s Hut net panord di Marriott Hotel.
E evento lo inicia awe mainta ora cu habri e proceso di registracion di e participantenan y e lo clausura cu e gran evento di premiacion cu lo tuma lugar dialuna anochi na Paseo Herencia.
E organizadornan ta spera participacion di mas cu 100 atleta for di diferente parti d mundo, kendenan lo compete den e specialidadnan di ‘slalom windsurfing,’ ‘kite boardin’ y tambe ‘freestyle windsurfing.’
Aruba Hi-Winds ta e evento di windsurfing di mas bieu den e region di Caribe. E prome edicion a tuma lugar na luna di Juni di 1987, riba iniciativa di e organizadornan local manera Anthony Blok y Ruben Croes.
E prome evento aki a resulta asina bon y tremendo, cu e conocido “Professional Boardsailing Association, esta PBA, a dicidi di sanciona e evento aki y converti Aruba Hi-Winds den parti di e World Tour di e competencia pa 1988.
Den e siguiente añanan, Aruba Hi Winds a transforma su mes den un di e eventonan mas renombra di e circuito di windsurfing mundial y atletanan renombra mundialmente, manera e ex campeonnan mundial Bjorn Dunckerbeck, Robby Naish y Andres Bringdal, ta ehempel di e nivel mundial cu a participa den e eventonan aki, teni na Aruba.
For di 1997 e evento di Aruba ya no a firma parti mas di e Professional Windsurfing World Tour y el a ser converti den un evento amateur pero cu a sigui goza di gran interes.
Un gran cantidad di ‘windsurfers’ for di tur parti di mundo, ainda ta biaha bin Aruba pa participa den e evento di cinco dia aki, ya cu fuera di competencianan espectacular di Aruba Hi Winds, e participantenan tambe ta keda encanta cu e partinan di entretenimento, cu ta forma parti di e programa extenso di Aruba Hi-Winds.
Tur e participantenan lo ricibi un lunch tur dia di careda mientras cu lo tin actividadnan social organiza riba each pa nan tur.
Gran parti di e weganan riba beach, ta wordo patrocina y organiza pa Amster Bright, cu tremendo premionan, caminda mas tanto e eventonan aki lo tuma lugar den fin di siman.
Den ultimo añanan a agrega e specialidad di ‘freestyle windsurfing’ na e programa total, y caminda e participantenan ta competi pa e premionan di ‘King-, Queen-, Prince-, y Kid of the Huts.’
E ultimo specialidad cu a wordo inclui den e programa di competencia, ta “kite boarding,” un deporte cu ultimo tempo tambe a crece enormemente den popularidad aki na Aruba.
Pa e evento di e aña aki, ta spera mucho mas participante for di exterior pa e specialidad aki, y e evento ta priminti di transforma su mes den un tremendo exito den e dianan cu ta bin.