Minister Adriaens: “Tin atenshon pa programa di Helmin Wiels”

WILLEMSTAD – “E programa di radio di Helmin Wiels realmente meresé atenshon di parti di gobièrnu, mirando sierto palabranan ku ta usa durante e programa. Ounke mester bisa tambe, ku no tin hopi espasio pa aktua, teniendo kuenta ku e libertat di ekspreshon ku ta eksistí.” Esaki ta loke minister di Tráfiko i Komunikashon Maurice Adriaens, a bisa LA PRENSA awe, relashoná ku pregunta i krítikanan ku tabatin riba e programa último dianan.
E minister a bisa, ku na e momentunan akí tin atenshon pa e programa di radio i ku tur hende mester tene nan mes na norma i balor ku ta konta den komunidat. “Un hende por tin su krítika riba mandatarionan, pero no ta nesesario pa yama hende na nòmber. Mester papia riba e tópiko i no riba e hende. No tin ningun sentido pa menshoná niun hende su nòmber na manera ofensivo. Den e kaso spesífiko akí, nos por aserká nan i bisa nan pa tene nan mes na reglanan di étika. Por konstatá regularmente, ku durante e programa nan ta agitá. Esaki por ta un motibu pa intervení, pero ainda no a yega na e punto ei. Ami personalmente ta responsabel pa e parti tékniko i mi tin ku kontrolá por ehèmpel si tur radio tin e kònòpi di ‘delay’ ku kual por filtra palabranan insolente i saka nan afó. Esei ta e ròl ku ami tin téknikamente.”
Pa loke ta trata e kontenido di e programa, e minister a splika, ku esei ta kai bou di minister Omayra Leeflang ku ta enkargá ku entre otro enseñansa. “Prensa tin un ròl importante den komunidat i ta p’esei mester evitá ku palabranan malu ta zona na radio. Komo gobièrnu bo mester duna un señal ku bo no ta aseptá tur kos. Mira kon minister Leeflang a atendé mes ora ku e korant Boletin, despues ku den un edishon a sali pòtrètnan pornográfiko. Via di Departamentu di Enseñansa e minister por atendé ku e reglanan di kontenido di korantnan i programanan di radio i televishon.”
Finalmente Adriaens a bisa, ku ta komunidat huntu ku gobièrnu mester vigilá ora programanan di radio òf kontenido di korantnan sali for di man. Segun e minister, komunidat tambe tin ku hasi su parti.