BOGOTA, Colombia, - Ingrid Betancourt i otro 11 polis i militarnan colombiano eks rehennan di FARC a kompañá presidente Alvaro Uribe durante e diskurso fo’i palasio presidensial durante kua el a felisitá tur esnan involukrá den e operashon di reskate.
Nan tur, huntu ku otro 3 sekuestrá merikano kendenan direktamente a bula bai nan pais, a keda librá ayera trempan den un operashon di inteligensia militar colombiano durante kua “no a realisá niun solo tiru”.
Den un seremonia televisá, e mandatario colombiano a urgí “Fuerzas Armadas Revolucionarias de Colombia” (FARC) pa aseptá invitashon di gobièrnu pa desmobilisá.
“Nos ta invitá FARC pa hasi pas i kuminsá libra tur esnan sekuestrá kendenan ainda ta den boso poder”, Uribe a señalá.
Uribe a kalifiká e operashon “Jaque”, manera e reskate a keda boutisá, komo homenahe na Derechonan Humano i a elogiá minister di Defensa, Juan Manuel Santos, i miembronan di Ehérsito di Colombia.
Un bosero di Kas Blanku a konfirmá ku gobièrnu di Merka a yuda, ounke e no a spesifiká detaye riba e karakterístika di e yudansa.
E bosero tambe a indiká ku Washington tabata na haltura di e operashon di reskate fo’i su fasenan inisial i tin sinku aña trahando ku gobièrnu colombiano pa logra liberashon di esnan sekuestrá.
Entre nan tin e kontratistanan merikano Keith Stansell, Thomas Howes i Marc Gonsalves, kapturá pa FARC na 2003.
E tres merikanonan ayera nochi mes a aterisá na teritorio merikano, na un base militar na San Antonio, Texas.
E embahador merikano na Colombia, William Brownfield, tambe a rekonosé ku ta’tin un estrecho koperashon entre e dos paisnan pa e operashon aki, inkluyendo suministro di inteligensia, ekiponan, trainingnan i eksperensia operashonal.