Skina di Sorti, awe djaweps 3 di yüli di 2008, ta kuminsá ku deseá tur hende un bon dia. Pa midi progreso di un pais, bo tin di wak bosnan outorisá riba un òf otro aspekto di maneho, den lus di e faktor krítiko pa un desaroyo eksitoso di e pais. Lokual ta bon pa argumentashon den kuadro di retórika polítiko, no ta apto òf sufisiente ora ta trata di un aserkamentu di apresiashon metódiko di maneho. Mi a yega di splika na algun okashon kaba ku e pregunta no ta kiko bo a alkansá, pero si bo a alkansá lokual bo por a alkansá.
****
Si bo ta usa IMF komo bos outorisá riba aspektonan di maneho (makro ekonómiko ku speshalisashon riba e parti finansiero monetario), nan proyekshonnan, entre kual esun di kresementu ekonómiko ta un “benchmark” ku mester aparesé den bo evaluashon despues ku e periodo determiná transkurí. E faktor krítiko pa alkansá e proyekshonnan ku IMF ta menshoná den su relato ta bira kriterionan di evaluashon di maneho.
****
Mi a bini ta mustra ku insistensia ku maneho di un pais semper bai mester ta di oumentá su kapasidat pa atendé ku “shock” eksterno. Mi a kalifiká e aspekto aki komo fleksibilidat (“resiliency”). Pa lokual ta nos nivel di devisa, e relato di IMF ta mustra ku nos ta dependé di kapital eksterno i ku retonan manera desaroyo global di komestibel i kombustibel eminente.
****
IMF ta skirbi ku: ”The current account deficit will remain large as a result, but will be financed by foreign direct investment and development aid, allowing reserve coverage to be maintained at existing levels. A negative factor is the global food and fuel price shock, which is boosting inflation”. Pregunta ta keda kiko ta e maneho pa redusí e dependensia aki? Kaminda bo tin poko influensia riba faktornan stratégiko, bo úniko opshon ta esun di krea reserva. Un maneho ku ta haks riba esun di splender rekurso di kompanan di gobièrnu ku Kòrsou a brasa.
****
Mi interpretashon di e proyekshon di IMF pa lokual ta e kresementu ekonómiko ta ku si bini un kambio drástiko den filosofia di gobernashon, esta ku kos lo bai bon den unu di “bloed, zweet en tranen”, i si kondishonnan global drecha en bes di sigui deteriorá, e kresementu lo ta modesto. Modesto den sentido ku e ta hopi bou di e nivel di otro paisnan den region. Paga bon tinu ku IMF ta bisa ku nan ta “voorzichtig optimistisch” den nan proyekshon.
****
IMF ta skirbi ku: ”The mission projects growth in the islands now comprising the Netherlands Antilles to moderate to some 2½ percent by 2011. This is cautiously optimistic, and is predicated on recovering export markets, increased capacity from recent infrastructure investments, and—owing to the introduction of a fiscal rule and debt forgiveness—improved business confidence.”
****
Pa di tantísimo bia IMF ta mustra ku nos a traha plan i ku si nan wòrdu implementá kos ta bai den bon direkshon. Pero nos no por karga speransa ku esei ta sosodé. Historia no ta laga espasio pa optimismo den e direkshon ei. Oportunismo polítiko ta keda un barera pa alkansá maneho efektivo. IMF ta skirbi ku:”Proposals to reform the pension and healthcare systems have been drawn up, and are awaiting government action. Tax policy and administration reforms for Curaçao are in the planning stages”.
****
E opservashon di IMF ku: ”The bigger ongoing challenge for policymakers will be how to use the limited tools at their disposal to support growth, while containing vulnerabilities”, ta papia palabra kla. Maneho pa yega na mas i mihó “resiliency”.
****
Un otro reto ku ta keda bini bèk den relato di IMF, sin ku nan ta hasi menshon di progreso riba dje ta ku pais mester bira mas kompetitivo. Nan ta duna áreanan kaminda esfuersonan mester wòrdu hasí. Mi ke remarka mesora ku ta trata di algu difísil. Pero sikiera nos mester mustra e intenshon i pretenshon di traha den e direkshon. Te ainda por a mira akshonamentu den direkshon kontrali.
****
Ku eksepshon di diverso esfuerso riba tereno fiskal, nada no a tuma lugá den direkshon di e siguiente opservashon di IMF: ”Fiscal policy needs to balance the twin objectives of preserving competitiveness and remaining sustainable. This calls for low tax, wage, and social contribution rates relative to competitors to attract business; yet, wages, pensions, and safety nets need to remain competitive with the Netherlands to attract and retain skilled labor. At the same time, public finances need to make room for commitments arising from entitlement policies”.
****
Otro opservashon di IMF ku maneho mester mustra intenshon den su direkshon ta: ”On expenditures, there will be a continued need for social transfers to mitigate the impact of high prices on vulnerable sections of society, and, absent reforms, transfers for entitlements. Therefore, fiscal adjustment would need to rely on rationalizing the civil service and processes in the new political structure and limiting wage increases to productivity growth.”
****
No por mantené e filosofia di tene tur hende kontentu i evitá doló. Mi ta ripití ku ta “bloed, zweet en tranen” so por wòrdu primintí. Mester kambia e tendensia di konsumo i esei no ta wòrdu lográ ku e pretenshon di tene tur hende kontentu.
****
Al final di e kolumna di awe, un opservashon riba e konseho di Raad van Advies riba e instituto “Toezichthouder”. Na órden nunka no mester tabata si e instituto ta mishi ku e outoridat di e institutonan demokrátiko. Na órden ta i mester tabata ta ku e instituto riba mes ta nifiká ku e institutonan tabata defisiente den nan funshonamentu i ku e finansiadó no tin konfiansa ku riba término korto nan lo por funshoná manera deseá.
****
Un realidat amargo ku “de politiek” mester aseptá. Ta un kondishon imponé pa e finansiadó ku básikamente ta enserá ku nos hendenan por keda hunga nan wega manera ku nan ke, pero ku e finansiadó ta sòru ku sierto kondishonnan ta wòrdu kumpli pa por disponé di e medionan ku e ta komprometé pa yuda kuné.
****
Pues e konseho di Raad van Advies ta korekto pa e pregunta ku tin violashon di reglanan konstitushonal. Pero ora ta trata di libertat pa disidí riba alokashon di medionan, e instituto “Toezichthouder” ta un faktor limitadó. E ta definí e kuadro den kual e libertat pa disidí ta kontené, miéntras ku ke mantené e benefishinan akordá ku Ulanda.
****
Laga nos yama e kosnan na nan nòmber i stòp di mantené aparensia. Nos a aseptá un kuratela finansiero. Lokual mester hasi ta di trese kambio den e filosofia ku a hinka nos den e situashon aki. Punto!!!!
****
Skina di Sorti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te mañan ku poder di Dios. Kòrda ku bo kontribushon dirigí na Skinalaprensa53@hotmail.com ta bon biní.