WILLEMSTAD -- Tur esten ku na Kòrsou tin masha hopi hende ta skohe pa flit abeha pa asina libra nan mes di molèster ku e bestianan aki ta trese, tin un problema serio na parto ost di Merka, pasobra abehanan di un forma no komprendibel ta disparsiendo di e área.
Un informashon publiká e siman aki den e korant merikano Seattle Times a mustra, ku preisnan di kuminda por bai subi bastante si no solushoná e echo ku abehanan ta disparsé sin tin un splikashon komprendibel. E realidat ta, ku mester di abeha pa enter flornan, pa esakinan bira kuminda pa hende. Pero e aña aki so kaba tin 36% di abehanan ku a disparsé, miéntras ku ekspertonan ku miedu ta opservando ku e porsentahe ta sigui oumentá drástikamente.
For di aña 2006 a opservá kaba, ku diripiente no ta mira masha abeha i tampoko ta topa ku abehanan bentá abou morto. Un posibel rason pa e situashon sin splikashon aki por ta uso di pestisida, un parasit nobo ku ta mata abeha òf un rason patogéniko. Banda di esaki por tin asuntu di mal nutrishon di e abehanan, falta di sufisiente awa òf awa kontaminá i e situashon ku por tin ku ta pone ku abehanan mester bula bai muchu leu, pa por haña flor pa alimentá nan mes kuné. “Nos tin un krísis kompleto”, asina presidente di e Kas di Hortikultura i Agrikultura Orgániko na California, e republikano Dennis Cardoza a bisa.
Empresanan merikano ku ta traha p.e. eiskrim a pone sèn disponibel pa asina hasi investigashon pa wak kiko ta pasando. Un empresa di eiskrim a bisa, ku e problema ta afektando 40% di su 73 fabornan. Esaki, pasobra den e sabor di eiskrimnan aki tin almendra, chèri i stròbèri, kualnan ta produkto di matanan ku ta dependé di abeha pa produsí fruta.
Di parti di Gobièrnu di California a proponé tambe no ménos ku $ 780.000 pa analisá e krísis aki i $10 mion pa investigashon riba abeha. E informashon i preokupashon aki mester ta rason pa na Kòrsou tambe bai pensa riba un maneho pa e tantísimo kasonan kaminda ta deklará presensia di abeha komo un molèster.