TEHERAN, - Preis di petroli a bolbe alkansá un rèkòrt nobo, impulsá pa kaidanan den e reservanan merikano i e retroseso di dollar.
Na London, e barí di krudo pa promé bia a pasa e barera di 146 dollar, miéntras ku na Merka e krudo liviano a yega 144,81 dollar.
Ta realisando e oumento despues di anunsio di gobièrnu merikano ku su inventarionan ta kayendo mas di loke a keda pronostiká siman pasá.
E preisnan mundial di petroli a dupliká den último aña.
E kombinashon di dollar debil, e demanda haltu di krudo i e temornan riba interupshon di e suministronan na Medio Oriente i na Afrika ta e èksküs pa e oumento nobo aki den e preisnan.
“E merkado aktual ta impulsá pa e dollar debil, i, debí n’e situashon desastroso di e merkado di akshonnan, e invershonistanan ta buskando un merkado ku ta ofresé mas ganashinan”, Tetsu Emori a bisa, kende ta gerente di fondonan basá na Tokio.
Ta debí ku e dollar a debilitá ta pone ku e invershon den e merkado petrolero ta mas atraktivo.
Tenshon
Ta spera ku preis di petroli ta bai elevá ainda mas si Banko Sentral Europeo disidí djaweps awó oumentá e tasanan di interes.
E presidente di “Organisashon di Paisnan Eksportadó di Petroli” (OPEP), Chakib Khelil, a bisa ku un oumento den e tasanan di interes lo debilitá e dollar ainda mas tantu i lo provoká un oumento nobo di e krudo.
E mas resiente oumentonan di preis di petroli tambe ta okurí meimei di e tenshonnan renobá entre Merka i Iran.
E minister di Petroli di Iran, Gholam Hossein Nozari, ayera a atvertí ku, si ataká Iran, su pais lo no keda ku brasanan krusá.
“Den kaso ku tin aktividat di algun tipo, Iran lo no keda trankil i lo reakshoná, i niun hende lo por imaginá kua lo bai ta reakshon di Iran”, Nozari a bisa.
Sin embargo, Nozari tambe a añadí ku Teheran lo no rekòrtá su suministronan, inkluso si Israel òf Merka atak’é.
Ku kara p’e reunion di siman benidero di G8, ku ta agrupá e paisnan mas industrialisá di mundu, e presidente di Rusia, Dmitri Medvedev, a pronostiká ku e preisnan lo yega asta 150 dollar pa barí.
“Desafortunadamente, e oumento di preis di krudo ta okashoná problemanan pa ekonomia mundial”, Medvedev a señalá.

Foto; Gholam Hossein Nozari 0307

Minister di Petroli di Iran, Gholam Hossein Nozari, a atvertí: “Si ataká Iran, mi pais lo no keda ku brasanan krusá!”