BOGOTA, Colombia, - E sekretario general di OEA, José Miguel Insulza, a felisitá gobièrnu di presidente Alvaro Uribe pa perfekshon di e operativo ku a kondusí na reskate di 15 persona sekuestrá den man di gueria colombiano di FARC, entre otro e eks kandidata presidensial Ingrid Betancourt i 3 merikano, un komunikado a indiká.
“Nos ta festehá liberashon di e rehennan, pa nan, pa nan famianan i pa sosiedat colombiano kompletu”, Insulza a bisa, sitá den e komunikado.
“E akshon realisá pa Fuerzas Armadas de Colombia, ta konstituí un paso mas den e proseso di pas di e pais andino”, Insulza di “Organización de Estados Americanos” (OEA) a sigui bisa.
E presidente brasileño, Luiz Inácio Lula da Silva, a ekspresá su satisfakshon i speransa pa esaki ta un paso importante pa liberashon di otro personanan sekuestrá i tambe pa pas.
Un komunikado divulgá pa Presidensia brasileño a ekspresá ku Lula a manda un abraso fraternal p’e rehennan i “a manifestá satisfakshon ku e notisia ei tan sperá pa komunidat internashonal di liberashon di e 15 rehennan”.
E presidente brasileño a ekspresá “e speransa ku a dal un paso importante pa liberashon di tur hende sekuestrá, rekonsiliashon di tur colombiano i pas na Colombia”, e komunikado a señalá.
Ecuador ku alivio a risibí e reskate militar di Ingrid Betancourt i otro 14 rehen, pero a lamentá ku e liberashon no tabata resultado di un negosiashon di pas, e minister di Defensa, Javier Ponce, a bisa AFP.
E presidente di Bolivia, Evo Morales, tambe a saludá liberashon di Betancourt huntu ku otro 14 rehen, den un operativo militar, i a manifestá su deseo p’e proseso di pas na Colombia avansá.
presidente di Costa Rica, Oscar Arias, a ekspresá su alegria pa reskate di e eks kandidata presidensial di Colombia i di otro 14 rehen, ku el a definí komo “un logro konkreto den e lucha kontra terorismo”.
“Na nòmber di pueblo di Costa Rica, i di mi mes, mi ta deseá manifestá nos alegria pa reskate di señora Betancourt i di otro 14 rehen”, Arias a ekspresá den karta mandá pa su kolega colombiano, Alvaro Uribe.
Vatikano a kalifiká e reskate di e rehen franses-colombiano Betancourt i di otro 14 rehen komo “un bon notisia” i un “señal positivo” pa “rekonsiliashon” na Colombia, un bosero a señalá na AFP.
Tambe, e presidente argentino, Cristina Fernández de Kirchner, a saludá liberashon di Betancourt, kende tabata den poder di FARC fo’i 2002, i a konsider’é un viktoria di bida i libertat.
E reskate militar di Betancourt i otro 14 rehen den poder di FARC ta representá pa Perú e triunfo di demokrasia riba terorismo”, e kansier peruano José García Belaunde a bisa AFP.
Tambe e funshonario europeo di Relashonnan Eksterior, Benita Ferrero-Waldner, a ekspresá su alivio i alegria pa reskate di Betancourt i otro 14 rehen di “Fuerzas Armadas Revolucionarias de Colombia” (FARC).
Di su banda, Spaña a ekspresá su “satisfakshon enorme” pa e reskate den deklarashonnan di un bosero gubernamental na AFP.
E kansier chileño, Alejandro Foxley, a bisa ku e operativo eksitoso di Ehérsito colombiano ku a reskatá Betancourt i otro 14 persona “nos ta spera ku esaki ta un promé paso pa un proseso signifikativo kontinuo, te ora logra pas permanente na un pais ruman, asina serkano ku Chile”.
E kansier di Nicaragua, Samuel Santos, a deklará ku e ta “kontentu” pa e reskate, pero tambe el a bisa ku tal akto no ta konstituí e berdadero solushon p’e konflikto armá na Colombia.
Mexico a felisitá liberashon di Betancourt i di otro 14 rehen i a hasi yamada na FARC pa libra e otro rehennan, asina kansieria mèksikano a informá.
Presidente di Guatemala, Alvaro Colom, tambe a felisitá liberashon di Ingrid i di e otro rehennan, asina e mandatario a afirmá den rueda di prensa.
E presidente di Panamá, Martín Torrijos, a transmití su satisfakshon na su kolega Alvaro Uribe despues di liberashon di Ingrid i di otro rehennan.
Michelle Bachelet, e presidente chileño a manifestá su “profundo alegria i satisfakshon pa reskate di Betancourt i a bisa: “Esaki ta un éksito di demokrasia, pas i libertat, i tabata un anhelo di komunidat internashonal kompletu”.
Gobièrnu di presidente paraguayo, Nicanor Duarte, a ekspresá su satisfakshon pa reskate di e dama polítiko.
Sekretaria di Estado di Merka, Condoleezza Rice, a bisa ku el a keda impreshoná p’e reskate colombiano di 15 rehen, ku ta inkluí 3 merikano i e dama polítiko franses colombiano.

Foto: Ingrid Betancourt 0307

Eks rehen Ingrid Betancourt dilanti di dos na man robes, ta brasa otro rehennan librá despues ku nan a aterisá na base militar na Bogotá ayera.