Prof. Dr Lorito ta yama tur hende bonbiní. Nos ta spera ku tur hende a pasa un dushi Dia di Bandera. Di loke Lorito por a mira, tur hende tabata den ambiente di patriotismo i amor pa nos isla. Nos ta spera ku esei no tabata e kaso ayera so, pero tur dia di aña.
*********
Lorito a para riba dak di un hotèl i nos a mira bou di nos un parti di hende pará. Ora nos a bai wak, lugá tabata Zus, Omayra, Hubert i Noris. Zus tabatin un bandera chikiritiku asina den su man ta zuai. Lorito a keda masha strañá, pasobra nos a mira un tènt pa hende importante i ta einan nan mester tabata. Ora nos a bai wak mas mihó, a resultá ku tabatin un problema ku asuntu di unda mester sinta si òf no.
*********
Lorito a haña masha straño ku hende ku a haña ménos voto i algun di nan ku no ta elihí mes, ta sinta dushi asina bou di un tènt i otronan ku nos pueblo a basha masha voto riba nan ta pará den balkon di un hotèl. T’asina nos kier krea union? Komprondé Lorito bon: tin biaha nos ta papia di union, pero nos mes ta krea desunion! Anto nos kier pa pueblo para tras di un kousa!
*********
Tin un kos mas ku a molestiá nos masha tantu mes. Di kon mandatarionan i invitadonan mester sinta den fresku i sobrá di pueblo den solo. Por ta, ku e kueru di pueblo si por soportá kalor i solo? Tin un kos ku no ta lógiko den e kaso aki. Si tin un hende tin un splikashon, laga nos sa!
*********
Nos a mira nos Obispu a slùip yega lat na e seremonia di ayera. Ku tur rèspèt pa nos Obispu, e kos no a keda masha bon. Na un aktividat di Dia di Bandera, simplemente komo invitado, bo no por yega lat, maske ta misa bo ta hasiendo. Ta un aktividat spesial ku tur hende sa for di adelantá ku ta bai tuma lugá i ki ora ta kuminsá. Un obispu ta representá henter un pueblo! Danki Dios ku Obispu Amado si tabat’ei na ora!
*********
Un hende a bisa nos tambe, ku nan ta masha rabiá ku e seremonia di bendishonamentu di bandera ta tuma lugá e dia promé. Nan ta haña, ku ta riba Dia di Bandera esei mester tuma lugá. Dia promé no ta Dia di Bandera!
*********
Lorito kier a splika tur hende, inkluso algun korant, ku ayera tabatin Dia di Bandera. Yen di aviso ta papia di dia di himno i bandera. E dia ta: Dia di Bandera. Un korant a pone grandi den su edishon spesial Dia di Himno i Bandera. Na emisoranan un petishon spesial: Dia di Bandera a pasa i para e avisonan. No hasi manera Dia di Tata ku riba djarason siguiente un prominente radio ainda tabata pasa e aviso di Dia di Tata!
*********
Nos no gusta ku e miembronan di Konseho Insular ku tin masha boka i ta baha nivel di reunion, ora hopi hende no ta skuchando, ayera a “bedank” pa e reunion. Si ta esei ta nan manera di protesta, anto nan a skohe un mal momentu. Nos ta spera ku den e próksimo reunionnan den Konseho Insular tambe nan lo “bedank”. Nos ta skapa di relatá nan i pueblo ta skapa di skucha nan. Ademas nan no ta dunando niun balor agregá na e diskushon, pero ta grita i fomentá odio i vengansa. Nos ta spera ku nan ta “bedank” tambe pa papia na radio (i TV). By the way, pasa un dushi fakansi largu (pagá)!
*********
Tabatin remarke riba ousensia di Goi na e aktividat di ayera. Lorito tin entendí, ku e mester a bai afó pa un tratamentu urgente. Nos ta haña ku Gezag mester a menshoná esei tambe! Awor a keda ku si fuera ta pa malu el a keda sin bin!
*********
Nos ta pendiente pa haña sa si Ombudsman lo investigá e kaso di siman pasá meskos ku esun di Marriott. Nos no ta bai rekord’é mas. E ta muchu boca callao ora ta kumbini’é (aparentemente). Laga nos sa si e investigashon lo ta “ambtshalve” òf “ambsgehele”. Lebumai nos! Te mañan ku Dios su poder!