WILLEMSTAD – Diferente mandatario sentral a sinti ku ta trata nan ku un falta di rèspèt riba Dia di Bandera. Ta algun aña kaba tin e sentimentu aki pero ayera a disidí di pone un fin na e situashon aki. E aña aki diferente mandatario a skohe pa nan no presensiá e seremonia bou di e tènt speshal di invitado. E ousensia di diferente mandatario sentral bou di e tènt speshal ku a pone pa dignatarionan tabata masha komentá ayera i awe. Esmas, por a mira algun di e mandatario riba balkon di un di e kambernan di Hotel Howard Johnson.
Un di e mandatarionan a bisa LA PRENSA awe ku ta pa algun aña kaba ta sinti komo si fuera ku mandatarionan sentral no ta Yu di Kòrsou. “Aña pasá no tabatin stul pa sinta”, asina el a bisa. Segun e mandatario aki a splika, no tin partidonan antiano. Ta pueblo di Kòrsou ta skohe su parlamentarionan i a base di esei ta skohe mandatarionan. “Pa nos no ta e punto si nos no kier a sinta riba e di dos, tres òf di kuater rei, pero mas bien a forma ku strukturalmente a bin ta atendé ku mandatarionan sentral. Na Boneiru, Sint Maarten. Statia i Saba nunka sa tin e problemanan aki”.
Riba e pregunta unda e problema ta sinta, e mandatario aki a bisa ku e komishon organisadó ta tira falta riba Bestuurscollege i Bestuurscollege ta tira falta riba e komishon. Por sierto ku tin e insinuashon ku parti di e komishon organisadó ta inspirá polítikamente. Dos di nan ta miembronan prominente di un partido di oposishon.
LA PRENSA a aserká minister di finansa Ersilia de Lannooy ku ta lider di Partido Nashonal pa un komentario ku e pregunta di kon el a bai para riba balkon. El a bisa ku e no a sintié tratá ku e rèspèt nesesario komo mandatario i a opta pa bai den e públiko ku su bandera. Ta despues a bai riba e balkon, asina el a bisa. “Hecho ta ku mi a bin ta selebrá Dia di Bandera tur aña. No ta importá unda mi ta, asina sra. De Lannooy a bisa. Pa loke ta trata e selebrashon di e aña aki e mandatario a bisa ku no por a sigui soportá loke ta pasa mas. “Nos no tabata kier ningun diskushon pa e kos no bira un kos mahos i ta p’esei nos a skohe pa nos no ta bou di e tènt”, asina e mandatario a bisa. E tambe ta bisa ku hopi biaha bo ta sinti ku no tin rèspèt komo mandatario ku ta salí for di Kòrsou. Esei ta resaltá por ehèmpel den kartanan di invitashon pa reunion kaminda no ta puntra si por òf no, pero ta djis konvoká dia i ora pa reunionnan”.
Promé minister Emily de Jongh-Elhage i e gobernadornan di Antia i Aruba si tabata bou di tènt. E promé minister antiano a trata di hasi tur su posibel pa evitá ku e asuntu aki ta bira un problema pero e no a logra, esmas, no ta tur invitashon a yega tampoko. Ta e hefe di protokòl di Antia (Kenneth Haseth) mester a bai buska nan.
LA PRENSA kier hasi algun opservashon riba loke a pasa ayera. Un kos remarkabel ta ku a bisa ku e selebrashon di ayera ta di Kòrsou. Si e selebrashon ta di Kòrsou ta di kon gruponan uniformá antiano (ku eksepshon di SKS) a partisipá na e desfilenan? Un otro aspekto importante ta ku miéntras figuranan polítiko ku hopi voto manera Ersilia de Lannooy i Omayra Leeflang tabata segun e aktividat riba balkon, hendenan ku ménos voto popular i ku ta a base di nos sistema di voto ta den posishonnan privilegiá si tabata sintá te dilanti. E ehèmpel aki ta resaltá un biaha mas e falta i konsistensha ku tin den nos sistema polítiko. E komishon organisadó mes no a komentá ainda riba loke a pasa ni tampoko e diputado responsabel pa e aktividat.
LA PRENSA tin entendí ku lo tin un reunion di koalishon próksimamente, entre otro riba loke a pasa ayera.