WILLEMSTAD – Famia Claret no tin pensá di entregá i lo sigui ku su kaso di entrada “inhustu” di outoridatnan, te ora bin un klaridat. Awe mainta un biaha mas miembronan di e famia a presentá na Ministerio Públiko ku un keho. Nan kier un kontesta por eskrito di Ministerio Públiko riba e investigashon ku e kaso den e kaso aki.
E kaso di entrada di Sero Toleransha dia 11 di mart último den kas di e famia na Wishi/Marchena a kousa bastante interogatorio, no solamente serka e famia, pero tambe serka otro famianan. E pregunta ku a kore manera un liña kòrá den e kaso aki ta, ki ora outoridat por drenta den kas di un hende si òf no i despues hasi manera nada no a pasa. E famia ta insistí ku e ta bibando un bida drechi i e no por ta parti di ningun sospecho. Outoridatnan por lo general ta bisa, ku semper por tin e tipo di e entradanan aki ku ta tuma lugá. E entrada na e kas di e famia tabata enkabesá pa Sero Toleransha dirigí awendia pa e kontroversial inspektor Abrahams.
Frederik Claret, kabes di e famia a bisa LA PRENSA awe mainta, ku pronto lo duna tur detaye di loke nan a pasa aden te awor, for di despues ku nan a hasi e denunsia na mart último. El a ripití ku lo sigui e kaso te na final, si ta nesesario te den korte.
Informashonnan ku LA PRENSA a haña ta hasi menshon i e hecho, ku na mei último, Ministerio Públiko a manda yama e famia pa un reunion. E famia a bai ku su abogado. Den e reunion ei fiskal De Jong a indiká kaba, ku no ta mira motibu pa mas investigashon. E famia i abogado a pidi pa nan haña kopia di e prosèsverbal. A dura un poko esei a yega serka e famia. Ta a base di esei a persistí pa un investigashon. Claret no kier a bai den detaye riba e prosèsverbal di e investigashon ku a traha di e kaso aki, pero el a bisa ku ta un dokumentu di apénas dos página ku un kontenido di “ko’i hari”. “Nos si no ta konsiderá e kaso aki ko’i hari. E ta tur serio ku tin, sigur konsiderando e trouma ku nos a pasa aden”, asina e la ripití awe mainta.
El a bisa, ku no ta aseptá e konklushon aki sin mas i kere ku nos ta laga e kaso muri. Despues di a bai Ministerio Públiko awe mainta, a akudí tambe na Staten di Antia i na despacho di minister di Hustisia David Dick.
Ekspertonan ku LA PTRENSA a papia kuné ta hasi menshon di e hecho, ku e famia por akudí na Korte pa pidi Korte instruí OM pa hasi un investigashon di e kaso aki. Pa esei tuma lugá sinembargo, mester di un posishon ofisial por eskrito di OM. Tanten ku esei no tuma lugá, e famia no por aktua, asina nan a bisa.
Den último lunanan tabatin diferente kaso di entrada den kasnan di hende di parti di outoridatnan, algun di nan ku sospecho fuerte i otronan sin masha indikashon. Esei a krea preokupashon den diferente seno. Den un di e kasonan ku a haña publisidat, apénas algun dia despues di e kaso Claret, polisnan a drenta den un kas, kibra diferente slòt, sin drecha nan òf manda drecha nan.
LA PRENSA na diferente okashon a atvertí pa e situashon kaminda ku entidatnan manera Sero Toleransha, RST, Tim di Aresto i otronan ta trahando sin kòntròl di ariba, loke ta kreando kuerponan independiente i sin kòntròl den nos Kuerpo Hudisial ku ta base pa un estado polisial. Nunka tabatin un reakshon ofisial riba nos komentarionan.