WILLEMSTAD – E outonan mas gustá serka ladronnan, ta di marka Mitsubishi Lancer i Toyota Hilux. Entre 2004 i 2007 nan a hòrta 128 Lancer i 99 Hilux. Despues ta sigui Toyota Yaris (96), Toyota Corola (56), Toyota Tercel (53) i Toyota Starlet (37). Di tur e 469 kasonan akí di vehíkulonan hòrtá, ta solamente 11% a solushoná.
E datonan akí ta presedente di un konferensha ku a tuma lugá entre 25 i 27 di yüni último. E konferensha akí tabata resultado di esfuersonan di e grupo piloto Motorrijtuigenbelasting en Keuringen ku Bestuurscollege a instruí pa hasi un estudio. E estudio tabata pa yega na optimalisashon di infrastruktura di vehíkulonan na Kòrsou. Dia promé di yanüari 2006 e proyekto Implementashon Plan Maestro Impuesto vehíkulo di Motor i Sistema di Kùr a kuminsá. E proyekto ta boga pa implementá e proposishonnan di mehoransa ku ta regardá reglamentu, atministrashon i kòntròl di aspektonan di un vehíkulo for di momentu ku e yega wèrf na Kòrsou te ora e bai krùsh.
Un di e puntonan di enfoke di e proyekto ta e fenómeno: kriminalidat di vehíkulo òf ladronisia di outo. Estadístikanan ta demostrá ku tin un diferensia grandi entre e kantidat di denunsia di ladronisia di vehíkulonan hòrtá i e kantidat di kasonan solushoná. Entre 2004 i 2006 e porsentahe promedio tabata 11%. Pa dominá i manehá e problema di ladronisia di vehíkulo mas mihó, e grupo piloto a proponé un gran kantidat di medida. Entre otro un sistema di kùrmentu pa atmishon di vehíkulo dor di Duana, introdukshon di un kùrmentu APK na e lokal di kùr i introdukshon di sistema pa sigui un vehíkulo pa asina por haña un bista di henter e trayekto di un vehíkulo.