WILLEMSTAD – Ministerio Públiko a laga hasi outopsia di lei riba e restunan mortal di e hòmber Guido Keizerweerd. Amigunan di e defuntu a hañ’é morto den su kas djarason mainta.
Tabata den kareda di 07.51 ku polis a haña notifikashon, ku den un kas na van der Stokstraat, e doño di kas lo tabata drumí sin ta duna señal di bida. Den promé instante no por a bisa ku ta trata di un kaso di morto natural, ni si tabata trata di un kaso di asesinato. Sinembargo Ministerio Públiko a konfiská e restunan mortal pa laga hasi outopsia di lei. Tambe a bai ku un laptop ku tabata pertenesé na e víktima. E resultadonan di e outopsia mester indiká kousa di morto di Keizerweerd.
Tin vershon ku algun amigu di dje a bai su kas, despues ku e no a presentá kaminda a palabrá kuné. Despues ku e amigunan no por a lokalis’é via telefòn, nan a bai su kas. E defuntu Keizerweerd a nase na Kòrsou i tabatin 35 aña di edat.