WILLEMSTAD - “Bandera ta un símbolo importante di un pais. Ta p’esei mi a pidi Dios awe mainta pa bendishoná Kòrsou. Mi a bisti awe na blanku, pasobra mi ke pas. Lo mi bishitá diferente lugá awe den kuadro di selebrashon di Dia di Bandera, pero mi ke pa e dia aki sirbi prinsipalmente komo un dia pa reflekshoná,” drs. Gimena van der Gen lider di frakshon di Partido Nashonal di Pueblo a bisa den Konseho Insular ayera en konekshon ku selebrashon di Dia di Bandera.
Van der Gen a rekonosé ku nos pais ta pasando den tempunan difísil i turbulento.
“Nos mester para ketu na e pregunta unda nos ta pará awe. Nos mester determiná ki tipo di pueblo nos ke ta, ki sorto di isla nos ke biba ariba i ki sorto di representante di pueblo nos ke ta,” asina e konsehal a duna di konosé.
El a bisa ku semper nos a biba na pas ku otro.
“Tempu nos a bai studia afó, nos tabata broma kon dushi nos ta biba ku otro. Laga nos no pèrdè esaki. Laga nos purba konservá e kos bon aki ku semper a karakterisá nos,” segun Van der Gen.
“Bandera”, segun e lider di frakshon di PNP, “ta símbolo di union”.
El a bisa, ku el a konta kuantu outo tabatin bandera ayera i ta notabel ku e kantidat e aña aki ta hopi ménos, kompará ku añanan anterior.
El a bisa, ku ora el,a papia ku hende, el a bin ripará ku hopi hende ta haña ku a malusá bandera di Kòrsou pa aktonan ménos nèchi den pasado resien. Tabatin asta partido ku a usa e bandera komo nan símbolo.
“Anto m’a bin komprondé, ku hopi hende no ke asosiá nan mes ku esnan ku ta malusando nos bandera,” Van der Gen a aklará.
E dirigente polítiko ta kere, ku a yega momentu pa para ketu i determiná kon nos ta bai sigui.
“Nos ta kanando un trayekto estatal importante pa nos futuro. Tin ta bisa, ku nos ta bendiendo nos outonomia. Mi ke enfatisá aki, ku nos partido en todo kaso no ta kanando e kaminda aki.
Ami ta haña, ku ora tin diferensha di opinion, mester tin márgen pa kombibí ku otro,” Gimena van der Gen a indiká.
El a bisa finalmente, ku mester reflekshoná profundamente den e pais aki.
“Ora nos bishitá e diferente iglesianan ku tin riba nos isla, nan tur ta yen. Ta esei ta e punto: hende tin fe den Dios. Mi ta spera ku Dios duna tur hende e forsa nesesario pa karga e pais aki,” e lider di frakshon di PNP a konkluí.