WILLEMSTAD - Kòrsou, awor mas ku nunka mester di su yunan. Kòrsou ta pasando momentunan difísil i mester di hende ku ta traha na su bienestar. Esaki tabata esensia di loke gezaghèber di Kòrsou, mr. Lisa Dindial a trese dilanti den su intervenshon den sala di Konseho Insular ayera den kuadro di selebrashon di Dia di Bandera.
E mandatario a bisa, ku ni maske kon positivo e ke keda, mester kòrda i para ketu na e susesonan di siman pasá. Nan a marka e dia di awe.
E susesonan aki tabatin nan impakto riba nos pais.
“Mi no tin un mensahe ku boso no a yega di tende kaba. Mi a bisa tur kos kaba den transkurso di e añanan tras di lomba. Loke mi ke hasi, ta hasi boso un pregunta: boso ta aki awe mainta, pasobra trabou a obligá boso pa t’ei? Òf boso t’ei, pasobra boso ta un bon yu di Kòrsou? Mi ta spera ku ta pa e último aki,” e promé mandatario di Kòrsou a bisa.
Segun gezaghèber Dindial, a yega e momentu pa tur hende para tras di Kòrsou.
“Awor mas ku nunka Kòrsou mester di su yunan. Kòrsou mester di esnan ku ta traha duru. Kòrsou mester di su yunan ku ta biba desente. Mundu no mester kere ku nos ta hende ku ta karesé di norma i balor. Esei nunka tabata asina i nos mester sòru pa esei no sosodé tampoko,” segun e promé mandatario di Kòrsou.
El a bisa, ku yu di Kòrsou mester sigui komportá su mes i proba lo kontrali. Awe ta un dia pa selebrá, pero nos mester sa na unda nos ta pará, e mandatario a bisa finalmente.