WILLEMSTAD - Nos a akshoná i nos lo sigui akshoná, pasobra nos ta konvensí, ku gobièrnu ta kanando e trayekto estatal robes pa nos pais, asina lider di MAN ingeniero Charles Cooper a ekspresá ayera, durante su intervenshon den Konseho Insular na okashon di e reunion solèm pa Dia di Bandera.
“Frakshon di MAN ta felisitá pueblo di Kòrsou relashoná ku selebrashon di Dia di Bandera. Nos ta sinti nos mes orguyoso di ta yu di Kòrsou,” asina Cooper a inisiá su disertashon.
El a bisa, ku su partido lo hasi tur kos pa fomentá un bon desaroyo riba nos isla, kaminda ta duna balor na logronan polítiko positivo. E yu di Kòrsou ta anhelá un mihó Kòrsou, segun Cooper.
Hustamente pa e motibu ei mes, el a bisa, MAN a bin ta akshoná, tantu den Konseho Insular komo pafó di órgano aki kontra e proseso estatal ku gobièrnu ta hibando.
Referiendo na loke lider di frakshon di PNP Gimena van der Gen a bisa, Cooper a bisa ku ta lógiko ku tin masha tiki hende ku a pega bandera riba nan outo.
“Esaki ta un señal kla ku e rumbo ku kosnan ta bayendo, ta robes,” segun Cooper.
El a bisa, ku di un banda MAN ta kere den forsa propio pa sali for di nos problemanan, di otro banda tin motibu tambe pa ta krítiko.
“Na opinion di hopi hende, e kaminda ku gobièrnu ta kanando pa kambionan estatal ta e kaminda robes. Pueblo no a skohe pa e direkshon aki,” el a bisa.
Kòrsou a bin ta pasa den un reto grandi. Gobièrnu parse ta sinti su mes poderoso pa dal bai ku e kambionan ku e ta kere ku e mester hasi.
“Aki mi ke para ketu na loke un eks presidente merikano a yega di bisa algun siglo pasá. Esun ku entregá libertat esensial pa bienestar temporal, no tin derechi ni riba libertat, ni riba bienestar. Benjamin Franklin a bisa e kos aki na 1769. Nos ta entregando tur loke nos tin, pa un supuesto saku di plaka,” di akuerdo ku e lider di partido MAN.
MAN ta rechasá e kos aki i lo sigui lucha pa un Kòrsou outónomo den Reino, sin pèrdè loke nos tin awor aki.
“Nos ke un pais manera Antia ta awor aki òf manera Aruba a haña na 1986,” el a añadí.
Charles Cooper finalmente a felisitá gobièrnu ku introdukshon di e siman na kaminda pa Dia di Bandera. Ora un kos ta bon, nos no tin problema pa bisa ku e ta bon i mester rekonosé ku introdukshon di e siman tabata un bon kos, e lider di MAN a agregá finalmente.