WILLEMSTAD - Nelson Pierre a gradisí pa e honor. Helmin Wiels a hasi mesun kos. Norbert George a manda diskulpá, e no por tabata presente. Forsa Kòrsou, simplemente no tabata presente.
Di e forma aki Konseho Insular di Kòrsou, ku riba un dia manera ayera lo mester a demostrá union pa selebrashon di 24 aña di bandera, a tene su reunion solèm, demonstrando klaramente kon dividí polítika ta na e momentu aki.
E reunion di ayera tabata kompletamente dominá pa e susesonan di siman pasá den kua manifestantenan a kometé aktonan di agreshon i di destrukshon kontra propiedat di hende.
Por a sinti klaramente ku impakto di e susesonan tabata kore manera un liña kòrá den tur loke a sosodé ayera mainta.
Tur esnan ku a hiba palabra, a referí na loke a sosodé i a pone esaki de konteksto di selebrashon di Dia di Bandera. Partikularmente partidonan di koalishon a bolbe enfatisá ku maske t’asina ku tur hende tin derechi di manifestá i ekspresá nan rechaso pa e direkshon ku e trayekto estatal ta bayendo, esei mester sosodé ku rèspèt pa otro i ku no por aseptá e eksesonan ku a tuma lugá siman pasá den sentro di siudat.
Ounke no tin prueba di esei, ta evidente ku aktuashon di partidonan di oposishon ayera tabata un forma pa manifestá di nan parti e malkontentu pa desaroyonan di último dianan.
Den su diskurso di órden, diputado di Kultura Marilyn Alcalá-Wallé a para ketu na e pregunta ku a bin dilanti ku hopi insistensia último dianan aki, esta ken realmente ta yu di Kòrsou. E pregunta aki a bira e pregunta di dia, mirando ku e susesonan di agreshon tabata dirigí kontra ulandesnan oropeo òf a lo ménos kontra esnan ku no ta di yu di Kòrsou.
Pa e mandatario, e yu di Kòrsou ta esun ku ta traha na adelanto i bienestar di nos pais.
Partidonan di koalishon a pone tur kulpa di e aktonan di agreshon i violensia riba kuenta di oposishon, algu ku oposishon a rechasá kategórikamente.
E esfera ayera no tabata un esfera di alegria. Eksperensia di último añanan ta mustra por ehèmpel ku kada oradó ta finalisá su diskurso durante e reunion solèm ku un ekspreshon di positivismo, estilo “Biba Kòrsou!” òf “Biba nos bandera!” Ku eksepshon di drs. Dennis Jackson, lider di frakshon di PAR no tabatin esaki ayera.