WILLEMSTAD - Den kaso ku gobièrnu di Kòrsou aprobá e petishon di Jan Thiel Bay Resort, pa haña e pida terenonan ku e ta deseá, pa ehekutá su proyekto, Stichting Humanitaire Zorg lo bai Korte ku e asuntu aki. Asina Norbert George, presidente di Fundashon Kuido Humanitario Kòrsou, a deklará.
Fundashon Amigu di Tera, públikamente algun dia pasá a hasi un apelashon na komunidat di Kòrsou, pa masalmente reakshoná kontra dje petishon di e proyekto di e desaroyadó di proyekto, Eduardo Halabi, ku entretantu a duna di konosé di ta deseá di haña tres pida repi di tereno èkstra pa e proyekto ku lo generá sigur 2 mil kupo di trabou.
Norbert George a menshoná e hecho ku Jan Thiel Bay Resort a hasi petishon pa hasi uso di un parti di e área konservá na Jan Thiel, ku ta konosí komo e área aki a keda stipulá pa lei komo área reservá. “Ta un área ku nos ta konsiderá di un balor haltu di naturalesa pa nos komunidat. Ta p’esei a protehé pa lei”. Segun George, na momentu ku Bestuurscollege i un desaroyadó di proyekto ta haña ku mester libra e parti di e área di konservashon pa un destino komersial mester realisá ku ta trata di e siguiente situashon: Na e mesun momentu ta surgi e situashon unda ku di un banda ta trata di zona di peliger, pasobra no ta pòrnada e área a keda konservá, i di otro banda si bo libra e área, esaki lo kondusí na un situashon unda ku mester libra tur otro. “Kualke otro desaroyadó despues lo por bisa ku a duna esun desaroyadó sí i ta dikon e no por haña”, asina Norbert George a indiká.
Pa loke ta trata e kantidat mínimo ku señor Halabi a indiká e siman aki ku su proyekto ta deseá di amplia pa loke ta trata tereno, George a enfatisá ku su fundashon no ta interesá den kuantu porshento dje tereno konservá e proyekto di Halabi ta deseá. “Si mañan un desaroyadó di proyekto pidi solamente un porshento di Christoffel Park, tampoko nos nó ta bai di akuerdo kuné”.
Ta p’esei, segun George, su fundashon ta determiná pa den kaso ku Bestuurscollege disidí ku ta duna Jan Thiel Bay Resort e pida terenonan ku el a pidi, e fundashon lo entamá e kaso den Korte.