ORANJESTAD- Orguyosamente Post Aruba ta emiti tres stampia na honor di motorcyclenan Harley Davidson.
Rhona Lemminga, diseñadora di e stampianan special aki di Harley Davidson, ta duna un splicacion tocante su diseñonan:
“The Knuckle-Head”
“The Road King”
The FRX Super-Glide Big Boy”
Stampia di 225 cen: “The Knuckle-Head”
E “Knuckle-Head” ta e veterano di tur motorcycle. Historia di motorcyclenan Harley Davidson a cuminza na 1903 na Milwaukee, Merca.
Bill Harley y Arthur Walter Davidson a introduci e prome motorcycle di un cilinder. Despues di esey, desaroyo a acelera masha lihe mes y nan a diseña diferente otro modelo di motorcycle.
Despues cu nan a produci motorcycle pa e ehercito Mericano, e marca Harley Davidson a crece mucho mas lihe ainda. Den careda di aña 1936 nan a diseña e “Knuckle-Head”, sigui pa “The Indian” y “The Panhead”. E “Knuckle-Head” a haya su nomber debi na e forma di e loke nan ta yama su ‘rocker boxes’.
Stampia di 305 cen: “The Road King”
Cuerpo Policial di Aruba ta usa “The Road King”. Ademas, miembronan di Cuerpo Policial di Aruba ta core diferente tipo y modelo di motorcyclenan Harley Davidson. Por reconoce e “Road King” facilmente na su tamaño mas grandi y su cara robusto, compara cu otro modelonan di motorcyclenan Harley Davidson. E “Road King” tin un luz blou grandi di alarma y dos cashi na banda na parti patras di e vehiculo. E “Road King” ta asina rapido cu e por alcanza tur sorto infractornan di ley.
Stampia di 175 cen: “The FRX Super-Glide Big Boy”
E “FRX Super-Glide Big Boy” realmente ta nifica nada mas cu un version luhoso di e “Big Boy” of e “Fat Boy”, e “Harley Davidson Classic” of e “Harley Davidsonh Sporter”.
Esakinan ta djis un paar di nomber cu nan a duna e modelo popular aki di motorcyclenan Harley Davidson.
Na Aruba turistanan y tambe nos mes hendenan local por huur e modelo aki. Motorcyclenan Harley Davidson ta facil pa reconoce pa nan sonido caracteristico, nan apariencia vigoroso y e cantidad di cromo riba nan.
Tur cliente cu ta desea di adkiri e emision special aki di motorcylenan Harley Davidson, por acudi na Oficinanan di Post na Playa, San Nicolas, Santa Cruz of Port of Call.
E emision ta valido for di 4 di juli 2008 te 3 di juli 2009.