ORANJESTAD- Desde 23 di juni te 1 di augusus Sarah-Quita Offringa tin cu enfrenta seis siman di competencia durante e Freestyle Tour di Professional Windsurf Association (PWA)
Di chiripa Sarah-Quita ta yega Lanzarote pa defende su titulo di campeon di e evento di freestyle na Costa Teguisa di aña pasa. Conciente di e deseo di su contrincantenan pa bah’e e ta nabega cu potencia.
E maniobranan super technico y su tactica durante cu e ta windsurf ta pone cu e ta gana dos di e tres dobbel eliminacionnan ariba e di cuater dia sigurando su victoria di e evento for di tempran caba. Awor e por nabega mas sosega y trankil pero Sarah-Quita ta mantene su forma y no ta cede tereno.
Sarah-Quita ta sigui domina mustrando cu e no ta perde ningun manga (heat) y cu e ta nabega na full un otro nivel. Paralisando su contrincantenan cu algun triki fenomenal e ta sinta firme na promer lugar mientras e otro windsurfistanan ta lucha pa di dos y di tres lugar.
Di e manera aki Sarah-Quita ta regala su mes cu poder di Dios su regalo di cumpli aña. Awe dia 4 di juli leu foi cas e ta cumpli 17 aña y nos di Aruba Sailing Association y Wind Racers Club Aruba ta dese’ele hopi anja mas di bida, salud y bendicion di Dios. Ademas nos ta keda pendiente di un temporada di competencia exitoso p’e ya cu e ta continua na Gran Canaria unda el a yega diadomingo pasa pa continua cu e di dos parti di e PWA freestyle World Tour di muher.
Unda dia 3 di juli te 18 di juli ta cuminsa cu competencianan di diferente disciplina manera freestyle, slalom y ola. E ultimo stop di freestyle pa Sarah Quita ta na e isla di Fuerteventura unda e ta participa tanto na e disciplina di slalom como freestyle.
Asina aki e bataya pa campeon mundial di windsurf freestyle femenino ta sigui te augustus. Exito Sarah-Quita.
Aruba Sailing Association ta desea tur e participantenan na Aruba Hi-winds exito y ta yama Quincy Offringa pabien cu su logronan na Lanzarote unda el a causa un malestar inespera na algun di e windsurfistanan ya bakia.
E ta para careda di Yoshida di Japon y tambe di e Canades Soltysiak promer cu e mes tin cu enfrenta e Brasilero campeon di Freestyle di 2007 Brawzinho Browne.
Marcilio “Brawzinho” Browne ta comenta cu su tata a competi na Aruba tambe durante varios anja na e evento di Aruba Hi-winds.