ORANJESTAD- Diahuebs atardi dia 3 di July 2008, a tuma lugar e acto oficial di ponemento di prome piedra pa e edificio nobo na Dakota cu lo ser yama YMCA “Jorge Guastavino” Center.
E ceremonia oficial di prome piedra a ser efectua pa Minister dio, Asunto Social y Infrastructura, Sra. Marisol Lopez Tromp y Sr. Jorge Guastavino. Sr. Guastavino tabata secretario general di YMCA for di 1967 te cu 1985. E edificio nobo di YMCA Dakota lo hiba su nomber na honor di su tremendo trabao y dedicacion pa hopi anja na comunidad di Aruba y na e hobennan di YMCA.
Durante di e ceremonia, Sr. Piet Janssen, President di Hunta di Director di YMCA, a bisa den su discurso cu nan ta realisa cu e soño aki ta bin cu hopi reto. Pero esaki ya nan a enfrenta caba 10 anja pasa na momento cu nan a reconstrui YMCA San Nicolas.
El a sigui bisa, cu nan lo percura pa e vision tuma lugar y cu Dakota ta ricibi su YMCA Center nobo cu e merese.
El a bisa cu tanto e hobennan y grandinan semper tabata gusta hasi uso di e facilidad di YMCA y esaki nan lo por hasi atrobe den futuro.
E edificio di YMCA na Dakota tabata den un condicion hopi malo. Hopi atento a ser hasi pa resolve e problemanan, pero ora tabata resolve uno otro problema tabata surgi. E ora a tuma e desicion pa re-emplaza e edificio bieuw cu ta existi ya pa 40 anja caba, cu un facilidad completamente nobo.
E edificio nobo lo ser construi den 4 fase. E prome fase lo costa Afl.1.6 million, cual ta consisti di e edificio principal, localnan pa les, localnan pa programa y cuido pa mucha despues di scol, un gym, computer room, biblioteca y localnan pa oficina. E segundo fase ta cushina y tercer fase ta basketball court cu dak y tribuna. E di 4 fase ta landscape y parkeerplaats. E costo di e tres ultimo fasenan ta 1.2 million..
Sr. Janssen a duna honor na Sr. Alex Nieuwmeijer, Managing Director di Divi Corporation, y Sr. Jan Veeman, Director di CEDE Aruba, cualnan ta instancianan cu a contribui cu un suma substancial pa e projecto aki. Tambe Sr. Janssen a reconoce Famia Hector Gonzalez.
Arubaway tambe ta un instancia cu a yuda hopi cu e projecto aki cu un suma hopo grandi. Presente tambe tabata tur e presidentenan di e clubnan di servicio na Aruba, kendenan a contribui na e causa aki tambe. Nan ta entre otro Rotary Club, Quota Club y Women’s Club. Un danki a bai tambe na Sr. Bert Kamsteeg di BK Consultants pa su tremendo apoyo pa cu e projecto aki.
Un danki grandi ta bai na tur e miembronan di e hunta di directiva di YMCA cu ta traha hopo duro pa nos hobennan. Tambe un danki grande na e staff y personal di YMCA cu tur di ta guia nos hobennan den un bon caminda pa futuro.
Pabien YMCA, pabien Aruba y especialmente e bario di Dakota!