ORANJESTAD- Preguntanan di e miembro di Parlamento, dr. Armando R. Lampe na Ministro di Salubridad Publico y Medio Ambiente, según articulo III.17 di nos Constitucion y según articulo 59 di Reglamento di Orden di Staten di Aruba:
1. Minister a anuncia via medionan di comunicación cu e construccion di e centro cardiologico na Centro Medico San Nicolas lo costa Af. 20 miyon, despues a sali publica den corant Amigoe (26 di juni 2008, pag.1) cu e gastonan envolvi ta Af. 4 miyon. Aki ta trata di un diferencia substancial. Cua suma ta corecto?
2. E centro cardiologico ta keda construi leu for di e unico hospital di Aruba. Ta trata di un intervencion sumamente serio y pesei ta logico cu un centro asina mester ta den un hospital pa por actua de inmediato ora surgi complicacionnan. Di con Minister a opta pa bai contra logica y pone bida den hende na peliger?
3. Den pasado no ta exactamente esaki tabata e motibo pa stop e funcionamento di e centro cardiologico di Dr. Lacle, pasobra e no ta den hospital? Di con awor si por, mientras cu e centro di Minister ta hopi mas leu di e hospital?
4. Minister ta papia di promove turismo medico via e centro cardiologico di Centro Medico San Nicolas. Den pasado a lanta Clinica Posada cu e mesun meta pa promove turismo medico. Esaki no a duna resultado, e patientnan di Clinica Posada ta exclusivamente hende local. Si e no a duna resultado den pasado, ki ta pone Minister pensa cu e biaha aki si ta bai logra?
5. Minister ta splica cu un di e motibonan pa bin cu un centro cardiologico na Centro Medico di San Nicolas ta cu lo baha gasto di AZV. Minister ta na altura di e ley di oferta y demanda. Una bez cu crea un centro cardiologico cu ta aumenta e oferta riba mercado local, lo bai aumenta e demanda pa intervencion cardiologico, cu e consecuencia cu e gastonan di AZV lo aumenta. Con Minister por defende ainda cu e centro cardiologico ta bin ba baha gasto di AZV?
6. Minister por informa Parlamento cuanto cardiologo local lo ta emplea na e Centro Cardiologico di Centro Medico San Nicolas? Na e momento aki Aruba conose diferente jui di tera cardiologo, un na Aruba ta cardiologo intervencionista. E cardiologo intervencionista jui di tera ta involucra den e projecto aki?
7. Hospital di Aruba na e momento aki ta keda usa inapropiadamente como lugar di cuido di ancianonan, dor di falta di mas facilidad di cuido di ancianonan. Wit Gele Kruis cada vez ta insisti pa tin mas medionan financiero pa por organiza un bon red di cuido di ancianonan. E proceso di ‘vergrijzing’ di nos pueblo ta bai rapido. Cu un par di miyon lo haci milager riba e tereno aki. Of pa meciona otro gran necesidad, un centro diabetico pariba di brug y otro pabao di brug, cu ta duna un cuido profesional pa e malesa creciente di diabetes of pa evita cu e ta bai asina leu, lo preveni hopi complicacionnan manera problema di curazon, cu na su turno lo juda baha enormemente e gastonan di AZV. Ke men tin otro prioridad mas urgente, pakiko Minister a scoge toch pa un centro cardiologico specialisa cu no ta un prioridad? Tin otro interesnan ta hunga un rol?
Fraccion di RED ta spera di risibi contesta verbal riba e preguntanan aki según articulo 59 sub 4 di Reglamento di Orden di Parlamento di Aruba den e proximo ‘vragenuur’.