TAIPEI / SHANGHAI, - Históriko buelonan regular entre China i Taiwan a kuminsá awe, den un demostrashon di konsiliashon entre e dos eterno rivalnan.
E promé di e buelonan, un avion di China Southern Airlines, a aterisá na aeropuerto Taoyuan di Tapei, kapital di e isla, prosedente di Guangzhou situá sùit di China, den e promé oranan di mainta, ku a transportá mas o ménos 250 pasahero.
Poko despues a sigui un otro buelo for di siudat sùit di Xiamen ku a aterisá na aeropuerto Songshan di Tapei.
E buelonan for di China lo sali for di vários siudat, inkluyendo Shanghai.
Lo inougurá un total di 36 buelo e fin di siman aki, konektando sinku siudat grandi chines ku ocho aeropuerto na Taiwan.
No tabatin buelonan regular, aparte di algun tiki buelo charter den épokanan di fakansi, fo’i aña 1949, ora e derotá fòrsanan nashonalista a huí bai Taiwan despues di e guera sivil chines.
A reanudá e buelonan danki na trabou di e presidente nobo taiwanes Ma Ying-jeou, kende a asumí e kargo na mei ku e kompromiso di revitalisá ekonomia di e isla ku algun relashon komersial i di tránsito mas estrecho ku China.
Ta kalkulá ku mas o ménos 50 mion chines ke bishitá Taiwan.
Esaki ta e promé servisio aéreo direkto regular entre teritorio chines i Taiwan den kasi seis dékada.
Entre otro medidanan di distenshon, kuminsando 18 di yüli, kada un di e partinan lo pèrmití tambe entrada di 3.000 turista diariamente.
Bon señal
Ámbos teritorio a separá despues di fin di guera sivil na 1949, pero China semper a konsiderá Taiwan komo un provinsia rebelde.
E relashonnan bilateral a kuminsá deskongela despues di e elekshon na mart último di e presidente taiwanes Ma Ying-jeou, kende a establesé stabilidat regional komo un prioridat di su polítika.
E buelonan direkto di fin di siman ta konsiderá esakinan un señal kla di mehoramentu den relashonnan entre e isla i e kontinente, despues di dékadanan di menasa i konfrontashonnan verbal.
E komersiantenan taiwanes a pronostiká ku e buelonan aki lo yuda rekuperashon di e ekonomia dekaí di e isla.
Esaki lo yuda China tambe mehorá su imágen internashonal ku kara pa e Olimpiadanan di Pekin.

Foto; Pasaheronan 0407

Pasaheronan chines na Pudong International Airport na Shanghai awe, ta atendé seremonia di e promé buelonan regular e fin di siman aki entre China i Taiwan.

Foto: Pasaheronan chines 0407

Pasaheronan chines riba pista di Beijing Airport ta subi na bordo di un buelo charter pa bai Taiwan awe.

Foto; Pilot 0407

Pilot di Xiaman Airlines sintá den cockpit ta zuai man. E pilot a transportá e promé grupo di pasahero chines i ta aterisá na aeropuerto na Taipei awe.