WILLEMSTAD - Djadumingu dia 6 di yüli, Prinses Wilhelmina Fonds ta bai organisá un tremendo Torneo di Dominó, den kuadro di su kampaña di informashon i konsientisashon tokante kanser di prostat.
Ta trata di un torneo den kua lo partisipá 14 klup di Dominó lokal, miéntras ku paralelo ku esaki lo tin otro torneo, pa personanan individual ku ke inskribí ku nan man.
Pa lokual ta trata e torneo di e klupnan, esaki lo hunga den dos pul i e ganadónan di e pulnan lo enfrentá otro den final.
E torneo di e personanan individual ku nan man tambe lo bai den forma di pul, di kua e ganadónan di kada pul tambe lo enfrentá otro den final.
E torneo lo tuma lugá den Hòfi Kultural di Sentro Kultural Kòrsou, ku ta situá den Koninginnelaan den Emmastad.
E torneo ta kuminsá 12’or di mèrdia i lo finalisá 6’or di atardi.
Entrega di premio lo ta 6.30’or di atardi.
Manera ta konosí, luna di yüni a keda simbolisá komo “Luna Blou” dor di Prinses Wilhelmina Fonds.
“Luna Blou” ta un kampaña den kua Prinses Wilhelmina Fonds ke pone atenshon i tambe trese e konsientisashon den komunidat pa e malesa di kanser na prostat.
Komo klousura di su kampaña “Luna Blou”, Prinses Wilhelmina Fonds kier a hasi algu spesial pa asina envolví e hende hòmbernan mas tantu den e kampaña aki.
Komo tal a bin ku e idea pa klousura e kampaña ku un torneo di Dominó, ku ta e wega faborito di e komunidat maskulino.
E torneo no únikamente ta habrí pa hende hòmber, hende muhé tambe por partisipá.
Personanan ku ke inskribí komo individual huntu ku nan man, por inskribí te ku djabièrnè 4 di yüli na Prinses Wilhelmina Fonds na Scharlooweg 52 òf via telefòn 461-1998.
Na momentu di inskribí mester registrá tur 2 nòmber. Tambe por inskribí riba djadumingu 6 di yüli promé ku e torneo na Sentro Kultural Kòrsou.
Partisipashon na e torneo ta grátis.
Durante e atardi aki Prinses Wilhelmina Fonds lo bai ta presente tambe ku su stènt di informashon, kaminda tur hende por hasi nan pregunta i risibí nan foyeto ku informashon riba prostat i kanser di prostat. Meskos tambe lo tin otro foyetonan ku informashon general riba kanser i Prinses Wilhelmina Fonds.
Prinses Wilhelmina Fonds pa medio di esaki ke invitá tur hende i prinsipalmente tur amante di wega di Dominó pa bin pasa un ratu kontentu sea komo partisipante òf pa apoyá e otro hungadónan, òf pa bin informá nan mes tokante prostat i kanser na prostat.
Kanser na prostat ta tratabel basta diagnostiká esaki na tempu.
Prevenshon ta mihó ku kura.