RIO DE JANEIRO – Liga de Quito, djarason a regalá Ecuador e trofeo mas importante den historia di futbòl dje pais ora el a koroná su mes kampion di Kopa Libertadores.
“Los Albos” a superá Fluminense 3-1 den tiramentu di pinalti di e final, den kua e kiper ekuatoriano Jose Francisco Cevallos a kue tres pinalti. Fluminense a gana e tempu reglamentario 3-1, loke a manda e wega den tempu èkstra i finalmente e tiramentu di pinalti.
Patricio Urrutiia, Franklin Salas i Joffre Guerrón a hinka e pinaltinan di Quito, i Cícero tabata e úniko ku a hinka pa Fluminense. “Pancho” Cevallos a kue e tirunan di e argentino Dario Conca, Thiago Nieves i Washington.
Neves a hinka e tres golnan di Fluminense den tempu regular, i Luis Bolaños a sakudí nèt pa Liga, ku na novèmber lo hunga e final mundial di klupnan.
E skor global tabata 5-5. Liga a gana 4-2 den e promé partido siman pasá na Quito.
Liga a bira e promé klup ekuatoriano ku a gana Libertadores, despues di e frakasonan di Barcelona di Guayaquil den dos final na 1990 i 1998, den kua Cevallos tabata su kiper. Ecuador no a gana niun título di kategoria ni na nivel di klupnan ni na nivel di selekshon, apart di e medaya di oro ku nan a kologá aña pasá den Weganan Panamerikano di Rio de Janeiro.
Fluminense tambe tabata buska su promé título kontinental i tabata parse na kaminda pa logra esaki ora ela sali manera un tròm na komienso dje wega.
Konsiente di su nesesidat pa anotá, Fluminense a subi kancha ku su kañonnan dirigí riba e gol di Cevallos.
Sin embargo, tabata Liga e promé pa anotá na di seis minüt, probechando manera semper e velosidat i potensia di Guerrón. E puntero drechi a risibí un bala largu di Damian Manso, el a skak diferente hungadó i a yega na e liña final, for di kaminda el a hasi un pase retrasá ku Bolaños a manda krusá den nèt.
E gol a sende e ánimonan di Flu mas ainda, animá den un stadion Maracaná pa rementá.

--
Montgomery kulpabel di bendementu di heroina

NORFOLK, Virginia – Tim Montgomery, un eks strea di atletismo kende a kai den desgrasia, djaweps a deklará su mes kulpabel di akusashonnan di bende heroina kasi un siman promé ku e fecha pa su huisio.
Montgomery a presentá su mes den korte di distrito di Norfolk, Virginia. E eks koredó pa pidi un huisio pa hurado ku tabata programá pa 9 di yüli.
E otro tempu doño di e rekòrt mundial di 100 meter a keda arestá na aprel i akusá di bende mas di 100 gram di heroina na Virginia. Un wes a ning’é libertat bou di fiansa na mei.
Den otro kaso separá, Montgomery a keda sentensiá na mei pa kumpli kuater aña di prizòn pa partisipá den un froude ku chèknan falsifiká.
Montgomery ta enfrentá un sentensia mínimo di sinku aña di prizòn pa benta di droga.