WILLEMSTAD – “Tur kompania di aviashon ku den pasado a yega di bula e ruta pa Kòrsou i esnan ku ke hasi esei den futuro, no ta hasi esei pòrnada. E kompania di aviashon tin mes tantu mester di nos, komo nos tin mester di nan. Ami no ta kere den asuntu di duna garantia di stul òf supsidiá un kompania pa e bula pa nos islanan,” asina Maurice Adriaens, minister di Telekomunikashon a aksentuá den su deliberashon ku parlamentu ayera.
Staten, riba petishon di e miembro di frakshon di PAR Glenn Liqui Lung a pidi e interkambio di pensamentu ku minister Adriaens pa weta kiko ta pensamentu di gobièrnu pa loke ta e problemátika aki.
Rònt mundu kompanianan di aviashon ta pasando momentunan difísil. E problema ta e oumento konstante di preis di petroli ku ta pone ku preis di kerosin ku avionnan ta usa komo kombustibel, tambe a bin ta konosé un desaroyo alarmante. Minister Maurice Adriaens, resientemente a partisipá na un konferensha den Karibe pa diskutí e punto aki, ku ta un punto di preokupashon tambe pa tur isla den nos region ku ta dependé prinsipalmente di turismo.
Manera LA PRENSA a informá for di algun siman pasá kaba, e mandatario antiano, despues di a skucha e diferente ideanan ku ta biba a bisa ku e no ta na fabor pa paga kompanianan di aviashon pa nan (sigui) bula pa nos isla. Ta konosí, ku debí na e situashon penoso ku ta reina serka kompanianan di aviashon, vários kompania a ekspresá e deseo di ke weta un tipo di kompensashon pa e buelonan ku nan realisá. Un kos ku Adriaens a bisa for di algun tempu kaba, ku e no ta di akuerdo kuné. Ayera den reunion di Komishon Sentral el a ripití e posishon aki.
Adriaens a splika, ku na momentu ku un kompania pidi plaka – anto generalmente ta hopi plaka nan ta pidi – e isla ku ta paga tambe ke mira rendimentu.
“Si nos komprometé nos mes pa paga, anto ta hopi sèn e kos aki t’ei kosta nos. Awor, si mi tin a lo ménos e garantia ku mi ta haña resultado positivo pa mi turismo, ta algu ku por konsiderá ainda. Pero no tin niun garantia, ku e plaka ku nos ta paga ei, en bèrdat ta redunda den mas turista,” Adriaens a duna di konosé. E minister ta kere ku mihó kos ku por hasi ta di bora merkadonan nobo.
“Nos tur sa ku kompanianan di aviashon merikano ta den problema grandi awor aki. Nan por tuma bo sèn, anto tòg stòp di bula despues. Ami ta kere mas lihé, ku nos mester konsentrá ménos awor aki riba merkado merikano i kuminsá enfoká riba merkadonan nobo, manera merkado latinoamerikano. Nos por pensa riba otro paisnan manera Spaña i Portugal. E plaka ku nos lo bai usa pa paga kompania merikano, nos por destin’é pa merkadeo,” di akuerdo ku minister Maurice Adriaens den parlamentu ayera.