WILLEMSTAD - “Ta masha importante pa nos tur hinka nos skouder bou di desaroyonan ku ta tumando lugá riba tereno di teknologia di informashon.
Ta ku e meta ei, nos ta preparando lantamentu di e ICT Platform, un plataforma ku mester uni forsanan riba e tereno aki pa traha huntu pa nos no pèrdè e desaroyo aki riba nivel mundial. Un plataforma asin’aki lo kondusí finalmente na mas kalidat i na un funshonamentu efektivo i ekonómiko. Nos ta kere ku esaki ta importante tambe, mirando e desaroyonan riba tereno estatal, kaminda Kòrsou ta na kaminda pa bira pais outónomo den Reino.
Nos ta kere ku ta un bon idea tambe pa yega na un ministerio pa enkargá su mes ku desaroyo di ICT,” asina Irving Roosburg, mènèdjer di informashon di gobièrnu di Kòrsou a deklará.
Un ministerio mester haña rienda riba tur loke ta sosodé riba e tereno aki den futuro.
E plataforma aki a nase despues ku sektornan riba e tereno aki a nota ku tin problema ku kada ken riba su mes no por solushoná asina fásil.
Poniendo esfuerso huntu, e ta bira muchu mas fásil pa atendé ku e tereno aki ku ta birando masha prometedor pa mundu, segun Roosburg. Den e plataforma tin sektor públiko i sektor privá: tin gobièrnu di Kòrsou, Gobièrnu Sentral i sektor privá.
Roosburg, huntu ku Monique Rafaela, direktor di Stimul-IT, Sigmund Sasso, kolaboradó di maneho na departamentu di P&O-ICT i kompañá pa minister di Telekomunikashon Maurice Adriaens a duna Staten un splikashon di kiko ta sosodiendo i kiko nan ta hasiendo pa fomentá un desaroyo sano riba e tereno aki. E plataforma, manera indiká kaba ainda no ta eksistí ofisialmente. Ta trata di un plataforma ku ta den proseso di lantamentu, asina esnan resente ayera a enfatisá, pa splika ku nan no tin kontesta pa tur pregunta ainda.
Monique Rafaela a mustra ku ICT ta hasi masha hopi kos posibel awendia.
E área di trabou di e plataforma ta hopi amplio, en realidat mes amplio ku ICT mes. ICT ta aparesé awendia den práktikamente tur loke bo ta hasi. Tin biaha e ta bin dilanti hopi fuerte, tin biaha e ta mas tantu den fondo, pero ICT ta determiná nos bida diario, el a agregá.
El a menshoná entre otro e-commerce, e-busines i pa invershon i en general sektor finansiero, e ta algu masha importante.
E plataforma ke konsentrá tambe riba su aplikashon den enseñansa segun Rafaela a trese dilanti. Aki mester tene kuenta ku loke bo entamá awe, bo ta mira e resultado podisé te aki un aña el a splika.
Un proyekto interesante den esaki ta e asina yama “One laptop per Child”.
Mediante un kòmpiuter simpel, ku no ta kosta hopi plaka, ta sera mucha konosí ku e mundu di kòmpiuter for di momentu ku e drenta enseñansa di fundeshi.
Un otro aspekto ta e asuntu di “internet exchange” un trayekto kaminda por bisa ku nos ta hasi uso di e krusada den tráfiko di Internèt.
ICT ta bira desisivo den tur loke nos ta hasi den futuro, p’esei ta importante pa nos mantené un posishon fuerte riba merkado.
Rafaela a menshoná e hecho sinembargo, ku si t’asina ku ántes nos tabatin un bentaha riba e tereno aki, awendia nos ta weta kon otro paisnan ta yegando hopi serka nos, ku riba su mes mester ta motibu di sierto preokupashon, el a agregá.