WILLEMSTAD – Gobièrnu di Antia a ekspresá alegria pa liberashon di Ingrid Bethancourt na Colombia. Promé minister Emily de Jongh-Elhage ta bisa ku djarason 2 di yüli tabata un dia históriko. “No solamente komunidat di Kòrsou a selebrá dia di bandera, pero mundu hinter a selebrá liberashon di e polítiko Ingrid Betancourt, kende despues di a keda sekuestrá pa mas ku seis aña, huntu ku 14 otro rehen a keda liberá for di man di grupo revolushonario FARC na Colombia. Netamente señora Betancourt semper a trata di yega na un solushon pasífiko entre e grupo FARC i gobièrnu kolombiano. Algun luna pasá, embahada i konsuladonan kolombianan rònt mundu a organisá un ‘stille mars’ pa konmemorá e di seis aña ku Ingrid Betancourt a keda sekuestrá. Na Kòrsou tabatin un misa dediká na e kousa aki i a hasi orashon pa salú i bienestar di señora Ingrid. I mira awe, e ta un pèrsona liber i manera mi por a komprondé, kla pa sirbi su pueblo atrobe. E liberashon di Ingrid Betancourt, huntu ku e otro rehennan, ta un paso di gran importansia pa pas i trankilidat den nos region. Por konsiderá esaki komo un sla duru kontra di violensia i un paso sólido den direkshon pa kaba ku aktonan di violensia okashoná pa gruponan ekstremista”, asina e mandatario antiano ta bisa.
Mas aleu e promé minister antiano ta bisa ku Antia Ulandes semper a mantené un relashon hopi intenso, pero prinsipalmente amikal, ku Colombia. “P’esei, na nòmber di henter komunidat di Antia Ulandes i na nòmber di gobièrnu di Antia Ulandes, mi kier felisitá henter pueblo kolombiano i mi kier felisitá presidente di Colombia, señor Álvaro Uribe, ku e gran logro aki”, asina e mensahe ta bisa.
Relashoná ku kaso aki minister presidènt di Antia señora Emily de Jongh-Elhage a manda un mensahe ayera pa presidente di Colombia dr. Alvaro Uribe Vélez via di nan Kònsul na Willemstad, señor Ricardo Andres Giraldo Alzate. E mensahe ta bisa tekstualmente: "Excelentísimo Presidente Uribe, Una calurosa felicitación por el encomiable esfuerza militar de rescatar sanos y salvos a los secuestrados por la FARC, donde también se encontraba la Doctora Ingrid Betancourt. Celebración que se hacemos extensivo en nuestra comunidad de las Antillas Holandesas con este acto de heroísmo y valor. Las Antillas Holandesas mantiene una relación comercial y fraternal muy intensa con Colombia. Por este motivo, el Gobierno y el pueblo de las Antillas Holandesas queremos felicitar a la Comunidad Colombiana residenciadas en las Antillas Holandesas y a todo el gran Pueblo Colombiano que esta viviendo un gran momento de gloria.
A usted Presidente Uribe una vez mas felicitaciones por su talante democrático y por su gran esfuerzo en traer paz a la región".