WILLEMSTAD – E dokumentario “Life and Debth” ta mustra hopi similaridat entre Kòrsou i Jamaica, prinsipalmente loke a pasa ku IMF. Kas di Kultura, Luna Blou i CTB ta invitá pueblo en general pa mira i komentá e dokumentario titulá “Life and Debth” awe nochi na Biblioteka Públiko.
Life and Debth produsí pa Stephanie Black a haña hopi aklamashon i premio. E dokumentario ku ta sostené pa UNESCO ta forma parti di e sinenan ku ta forma parti di e organisashon Muestra Caribe. Meta di Muestra Caribe ta pa demostrá e diversidat i rikesa di kultura Karibense i a la bes logra hiba un diskushon interinsular tokante retonan ku e paisnan di Karibe ta konfrontá.
Caryl Monte un di Kòrsou su ekspertonan riba tereno di ekonomia, konosí internashonalmente, lo tene un introdukshon i lo aksentuá e aspektonan ku nos lo weta den e sine ku ta similar pa e situashon di Kòrsou.
Den e sine “Life and Debth” ta mustra kontinuamente e bida dushi di e turista ku ta bishitá Jamaica i e kontraste e lucha di dia pa dia di e hamaikino. Jamaica ta un pais independiente pero e ta keda dirigí pa organisashonnan internashonal, manera fondo Monetario Internashonal. Dor di laga e hendenan komun i koriente mes na palabra bo ta bin komprendé e kompleksidat di fiamentu di sèn, e akumulashon di debe, komersio liber, polítika di ahuste struktural i e resistensia di e pueblo.
Na 1976 e promé minister di e tempu ei Michael Manley a firma un tratado ku IMF ku ta primintí ku si nan hasi loke IMF bisa, situashon lo drecha. IMF a asumí ku si kita tur impuesto riba produktonan ku ta drenta, si baha impuesto di ganashi, si hisa impuesto di OB, si gobièrnu privatisá tur su kompanianan, e situashon ta drecha. Al kontrario situashon a empeorá. Loke a sosedé ta, ku esnan pober a bira mas pober, paso e desempleo a subi, industria lokal a kibra, e salarionan a baha drástikamente, violensia a subi i tambe analfabetismo. A pone yen restrikshon pa por eksportá produktonan lokal, pero ta dùmp produktonan di eksterior, ku hasta ta hasi daño na hendenan su salú i no tin manera pa impedí esaki. E situashon a kibra e proseso demokrátiko den e pais, paso korupshon tambe a subi. Miéntras ku na Merka i Europa e kunukeronan ta haña supsidio di nan gobièrnunan, produktonan lokal mester kompetí sin ningun klase di supsidio di gobièrnu. “Life and Debth” ke mustra kiko ta konsekuensia di polítika ekonómiko riba bida diario di hende den un pais. E sine aki tin hopi aspekto ku ta similar na Kòrsou. Nos ta invitábu bin wak e dokumentario i na final huntu ku e eksperto riba tereno di ekonomia señor Caryl Monte por diskutí kiko esaki ke men pa Kòrsou.