Presidente di Kámara di Komèrsio Ruud Thuis: “Guia i informashon ta nesesario pa un negoshi ta eksitoso”

WILLEMSTAD -- Den kuadro di stimulashon di desaroyo di empresa bou di hóbennan, 20 hóben empresario a partisipá durante 3 luna largu na kurso i workshopnan intensivo pa prepará nan mes pa drenta mundu empresarial. Profeshonalnan riba diferente área ku tin di haber ku hasimentu di negoshi a duna e kurso for di 3 di aprel te ku 26 di yüni durante 3 biaha pa siman den ouditorio di Kámara di Komèrsio, di 6 or pa 9 or di anochi.
“E promé paso pa tin un negoshi eksitoso ta optené e guia i informashon nesesario”, segun Ruud Thuis, presidente di Kámara di Komèrsio. Ku esaki Thuis ta splika ku na ora di kuminsá ku nos mes negoshi nos mester wòrdu guiá dor di profeshonalnan den e área òf dor di empresarionan ku eksperensia den mundu di negoshi. Esaki ta un punto hopi importante pa mantené e kontinuidat di e negoshi den kual por sierto edat di e negoshante no mester ta di influensia sino e konosementu riba e área. Kurso di Desaroyo Personal ku tabata e promé ku a kuminsá e proyekto ku ne a yuda e hóben empresarionan aki pa kambia nan mentalidat i aktitut i kuminsá pensa i aktua manera un empresario eksitoso. A desaroyá e pakete di kurso mirando e nesesidat ku un empresario lo tin na ora di kuminsá ku su mes negoshi i a implementá banda di esun di desaroyo personal, desaroyo di empresa, pasonan pa subi merkado, atministrashon, i kòmpiuter komo hèrmèntnan den negoshi i desaroyá plan di negoshi. Banda di e kursonan aki a sigui workshopnan interaktivo ku tabata konsistí di étika den negoshi, maneho di rekurso humano, desaroyo di struktura legal di empresa, belasting, lei laboral, abilidatnan pa negoshá, presentá dilanti di públiko i kon pa atendé ku banko.
Meta di e proyekto aki ta pa yuda e hóbennan desaroyá nan idea di negoshi, realisá i establesé esaki. E proyekto aki a siña e hóbennan komprondé e demanda di merkado i kua direkshon nan tin ku kue komo empresario na Kòrsou i eksterior. E oportunidat aki ta hopi importante paso tin un nesesidat grandi di guia práktiko, training i konseho riba kon pa manehá un negoshi. Esaki no ta tur biaha aksesibel na empresarionan ku ta bai kuminsá i sigur no na esunnan mas yòn ku no tin e kapital pa invertí den kursonan i workshopnan. Hopi di e hóbennan aki tabatin nan idea di negoshi kaba òf e negoshi mitar realisá dor di no tin e guia i informashon nesesario. Despues di a sigui e proyekto aki nos a mira negoshinan ku a kuminsá òf sigui den área di kuido pa mucha, benta di produktonan saludabel, benta di paña, redusí gastu di konsumo di awa i koriente, agensia di publisidat, negoshi di importashon di produkto, entretenimiento pa turista, negoshi ku ta brinda servisio di fèrf i hopi mas. Tambe nan a haña entre otro instrukshon interaktivo di kon pa atendé ku kliente, manehá tempu, maneho di rísiko i maneho di kalidat di nan negoshi o produktonan. Nan a siña identifiká merkadonan nobo i trese inovashon den nan strategianan pa ku nan negoshi.
Pa mas informashon riba proyekto Hóben den Negoshi tuma kontakto ku: Sra. Caroline Zimmerman òf Sra. Kirsten Römer na Kámara di Komèrsio i Industria Kòrsou, 461-3918. E organisadónan a manda un danki spesial na Dienst Ontwikkelingssamenwerking, Support to the Netherlands Antilles and Youth Development Programme (SNAYDP) ku a hasi e proyekto aki di Kámara di Komèrsio i Industria Kòrsou posibel i eksitoso.