WILLEMSTAD – Frakshon di MAN den Staten a manda un karta pa promé minister Emily de Jongh-Elhage reklamando ku Staten no a haña kopia di e konseho di raad van Advies riba e Medida General di Supervishon Finansiero di Konseho di Konsulta. Miéntras tantu diferente medio ta sitando for di e konseho, asina miembro di e partido Dwigno Puriel ta bisa den un karta.
Puriel ta bisa ku dia 12 di yüni último a trata den Parlamento, e medida general di Supervishon di Gobièrnu di Reino ku ta instituí e Komishon pa Supervishon Finansiero i ku alabes ta pone Antia, Kòrsou i San Martin bou di kuratela finansiero. Frakshon di MAN ta desaprobá i a protestá fuerte kontra e tratamentu aki paso, kontrali na reglanan parlamentario usual i normanan di bon gobernashon, a trata e proyekto di lei aki den un reunion públiko di Parlamento sin ku ta tin entre otro un konseho di Konseho di Konsulta. Entre tantu MAN a tuma nota den medionan di komunikashon ku e konseho aki a keda trahá i mandá pa bo gabinete. Te asta ta asina ku diferente medio di komunikashon a saka artíkulonan sitando partinan di e konseho aki. Frakshon di MAN ta lamentá ku Parlamento di Antia, e órgano konstitushonal di representashon di Pueblo di Antia, ainda no ta asina dichoso pa tambe a risibí e konseho aki di parti di bo gabinete. Nos frakshon abiertamente ta puntra su mes kon por ta posibel ku medionan di komunikashon si tin e konseho aki anto Parlamento no. “Pa e motibu aki Frakshon di MAN ke aserká i ta urgí bo persona pa demonstrá mas rèspèt i transparensia i ounke ta lat, ainda ku e urgensia nesesario, manda e konseho ariba menshoná pa Parlamento”, asina e karta ta bisa.