ORANJESTAD- Despues cu Minister di Turismo y e comicion organizador di Aruba Music Festival a nuncia e line up di e aña aki pueblo di Aruba a keda den espera pa por cumpra nan ticket di entrada pa e fabuloso 2 anochinan di concierto.
Pa medio di esaki Aruba Music Festival kier a informa na tur fanaticonan di tanto Reo Speedwagon como Gloria Estefan cu entradanan pa e conciertonan lo bai ta obtenibel entrante diahuebs 10 di july na tur SETAR Teleshop y mester remarca cu e “Gold Circle” ticket lo bai ta obtenibel solamente na SETAR Teleshop na Irausquinplein esta e ofcina banda di Post Aruba .
Manera a ser anuncia e festival lo bai tuma lugar den Aruba Entertainemnet Center y ta custumber cu Aruba Entertainement Center tin 3 area y fanaticonan di e artistanan por escoge na unda nan kier sinta durante e conciertonan.
Entrada:
US$ 125,= pa asiento “Gold Circle” (cantidad limita)
US$ 75,= pa asiento di preferencia
US$ 50,= pa admission general
Aparte di e teleshopnan di SETAR entrada lo ta obtenibel tambe via internet via
www.ticketweb.com y na De Palm Tours.
Aruba Music Festival:
Di acuerdo cu Ing. Edison Briesen, Minister di Turismo y Transporte y Comicion di Aruba Music Festval desde cu a anuncia e line up luna pasa e demanda pa entradanan pa tur dos anochi ta super grandi den tur mercado y kier a informa pueblo di Aruba cu un cantidad remarcabel a ser poni un banda pa e mercado di Aruba pero cu esaki ta obtenibel tanten cu tin den stock.
Asina ta recomenda pa tur hende cu kier garantiza nan entranda pa mira Reo Speedwagon y Gloria Estefan den concierto na Aruba dianan 10 y 11 di oktober respectivamente pa buska nan entrada lo mas pronto posibel y NO warda pa mañan. Y corda cu e capacidad di espacio den Aruba Entertainment Center ta limita.
Patrosinadornan di AMF 2008 ta:
Ministerio di Turismo, Aruba Tourism Authority, Renaissance Aruba Resort & Casino, Hyatt Regency Aruba Resort & Casino, Marriott Aruba Resort & Stellaris Casino, Radisson Aruba Resort & Casino, Occidental Grand y Westin Aruba.