ORANJESTAD- Parlamento di Aruba ta tratando na yega na otro pa asina haci un voordracht pa loke ta trata e presidencia di Contraloria General.
Desde anja pasa juni e proceso aki a inicia ora Parlamento a ricibi carta di Contraloria General cu contrario na pasado cu ta nombra un persona renombra den e organo aki lo haci un proceso di sollicitacion pa cu e candidatonan.
Aki Parlamento a contesta na september 2007 cu lo Parlamento lo ke mantene e sistema usual cu tin, esta di apunta personanan califica y renombra cu un reputacion intachabel den comunidad, mirando cu ta trata un organo halto segun nos Constitucion.
Desde december di anja pasa a trata e nombernan proponi sinembargo aunke cu a parse cu a yega na otro den reunion di comision central, e reunion publico di dia 11 di januari a ser suspendi te dia 26 di februari y esaki atrobe a keda suspendi suspendi te dia 28 di februari unda a vota y a resulta cu e candidato pa Presidente no a carga mayoria di dos tercera parti di e total miembronan di Parlamento presente.
Esaki segun nos Constitucion. Den reunion publico di dia 5 di maart a dicidi di manda e proposicion bek pa reunion di Comision Central y Parlamento a dicidi di manda un carta pa informa Contraloria General di esaki y pa por manda Parlamento un otro proposicion. A base di contesta di Contraloria General pa Parlamento mes bin cu proposicion, Parlamento a tuma decision pa lanta un Petite Committee, consistiendo di representante di cada fraccion, cu e tarea pa dentro di un par di siman yega na un proposicion pa Staten.
Un fraccion esta di RED a bisa cu e lo no participa den e committee.
Despues di e promer reunion a pidi pa uitstel te dia 1 di juli y a pone ariba agenda pa trata e proposicion den Comision Central dia 4 di juli, cual reunion a ser suspendi pa motibo cu e comision no a yega ainda na un proposicion. E fecha pa e siguiente reunion ta dialuna dia 7 di juli, en espera cu si lo yega na un decision promer cu reces, cu lo cuminsa otro siman.