WILLEMSTAD.- Djasabra 5 di yüli último Liga Hubenil di Basketbòl Kòrsou a klousurá e promé periodo di un seri di partido ku a tuma lugá durante di kuater fin di siman konsekutivo, durante kua e diferente nivelnan hubenil di Basketbòl tabata den kompetensia.
E klousura a tuma lugá den Sala Niels Liberia, na Suffisant, ku dos wega ‘All Star’.
Den e promé partido, un ekipo di dama formá pa Royal Hoops i B&M Sisters a gana di un ekipo di streanan mucha hòmber Aspirant i Mini di Royal Hoops i Lettermen. Tabata un partido bringá hopi bon di ámbos parti, pero prinsipalmente e damitanan a demostrá, ku nan no ta baha kabes pa hende hòmber i a bin bèk di un desbentaha pa gana ku skor di 35-31.
Topskorernan serka e damanan tabata Naima Tromp ku 12 punto i Roxanne-Lianne Francisca ku 6.
Esnan ku a sobresalí serka e muchanan hòmber tabata Kenville Kleinmoedig, ku 9 punto i Giomar Bernardus ku 8.
Despues di esei a sigui ku un wega elektrisante na nivel di kadet (16-17 aña), den kua tambe a inkluí 2 mucha muhé, 1 hungadó aspirant i 1 mini di manera ku esakinan ta haña eksperensia hungando na un nivel mas haltu.
All Star West a sali bai dilanti 6-0, pero rápidamente East a empatá.
E ekiponan a sigui hinter e partido hopi nivelá, pa despues West kue un bentaha di komo dies punto. Pero un biaha mas East ta yega hopi serka i West den e minüt final mester a tene e bala, p’asina gana ku apénas dos punto di diferensha: 64-62.
Xendrich Arnaud a skor 18 punto pa West, miéntras ku Clarence Pieters, Wahid Sedney i Michael Rubio tabatin 14 punto kada un.
Serka East tabata Michael Osepa ku a destaká ku no ménos ku 42 punto.
E aspirant Waynor Wederfoort a saka kara anotando ocho.
Ku e weganan aki, Liga Hubenil di Basketbòl Kòrsou ta bai ku fakansi.
Ta e intenshon pa reanudá ku e torneo despues di fakansi, pendiente kampionato di Federashon di Basketbòl (CuBafe).