MIAMI, Florida, Merka, - E tormenta tropikal Bertha a bira e promé orkan di temporada Atlántiko di e tormentanan di 2008.
Awe mainta 5’or orkan Bertha tabata situá nortwèst di islanan Leewards.
Sentro Nashonal di Orkan a indiká ku ainda no tin señalnan konfiabel si e orkan aki lo mishi ku tera.
E bientunan máksimo di Bertha lo sigui elevá i ta ferwagt ku nan lo sigui oumentá durante próksimo dos dia,
E sistema, ku ta den awanan sentral di Atlántiko, a keda formá siman pasá djaweps, pegá ku e isla di Cabo Verde, frente e kontinente afrikano.
E fenómeno aki ta dirigiendo direkshon wèst 33 kilometer pa ora, i su bientunan a alkansá máksimo di 120 kilometer pa ora.
Segun Sentro Nashonal di Orkan di Merka, ta ferwagt ku e tormenta lo fortalesé gradualmente, aserkando e awanan mas kayente.
Bertha ainda no ta situá serka di kosta.
Pronóstikonan di e Sentro di Orkan a indiká ku e tormenta lo mantené den laman, ounke a sigurá ku ainda ta hopi trempan pa determiná si e lo afektá algun área di tera.
Esaki ta e di dos tormenta tropikal di e temporada.
Esun promé, Arthur, a keda formá 31 di mei último, un dia promé ku e temporada di orkan a kuminsá ofisialmente.
Arthur a desintegrá despues di mishi ku tera na península di Yucatán.
E merkadonan energétiko ta vigilando djaserka e tormentanan tropikal den Atlántiko debí n’e riesgo potensial ku esakinan ta presentá pa e instalashonnan petrolero den Golfo di Mexico.
E temporadanan di orkan di 2004 i 2005, ku a inkluí orkan Katrina, ta e orkan ku a inundá New Orleans, a tumba òf generá interupshonnan na hopi plataforma petrolero i ku a kousa ku preis di krudo a oumentá i yega nivelnan históriko.
Di otro banda, Ofisina di Meteorologia di República Dominicana (Onamet) awe a sigurá ku Bertha no ta representá niun peliger pa Caribe.
Maske ta asina, ta sigui monitor desaroyo di e tormenta.
A rekomendá embarkashonnan chikitu pa nan apstené nabegá na zona di kosta i pa nan no kore rísiko subi laman tòg, debí n’e bientunan i olanan.

Foto: Bertha 0707

Imágen emití pa NOAA por mira bista satelital di Bertha, na man drechi meimei. Bertha a bira e promé orkan di temporada di 2008.