MIAMI, Florida, Merka, - E presidente venezolano Hugo Chávez tabata personalmente involukrá den e esfuerso pa skonde partisipashon di Venezuela den e skandal di maletin di 800.000 dollar, di kua e destino berdadero supuestamente tabata pa kampaña elektoral di e aktual dama presidente di Argentina, Cristina Fernández de Kirchner, di akuerdo ku testimonionan rekohé pa FBI sitá den un moshon presentá siman pasá na un Korte di Miami.
Di akuerdo ku e dokumentonan presentá na Korte federal na Miami 27 di yüni último, e empresario venezolano Franklin Durán, un di e akusadonan kende a aktua komo agente no registrá den representashon di gobièrnu venezolano, a deklará ku su sosio Carlos Kauffman, tambe impliká den e kaso, a involukrá presidente Chávez direktamente den su testimonio dilanti agentenan di FBI.
Den su testimonio dilanti FBI, Kauffman a bisa ku abogado Moisés Miaonica a sigur’é “ku presidente Chávez tabata involukrá den e asuntu i ku a pone na kargo e direktor di Disip, Henry Rangel Silva, i ku Rangel Silva a bis’é ku presidente Chávez tabata personalmente involukrá den e kaso.
Esaki ta e promé bia ku e presidente venezolano ta aparesé direktamente impliká den e asina yamá “skandal di maletin”.
Te ku awor aki e moshonnan presentá na Korte pa e kaso di maletin a impliká e direktor di Disip i e ofisina di vise presidente di Venezuela, Jorge Rodríguez, pero no a menshoná e mandatario venezolano.
Segun e abogado di Durán, Edward Shohat, e testimonio di Kauffman implikando Chávez den e skandal, Fiskalia lo us’é pa proba ku Durán tabata aktua komo agente no registrá na Merka na fabor di gobièrnu di Venezuela.
A akusá Durán di a aktua komo agente estranhero huntu ku Carlos Kauffman, e abogado Moisés Maionica, e intermediario Rodolfo Wanseele Pacielo, i Antonio José Cánchica Gómez, un supuesto agente di inteligensia militar venezolano (DIM), kende aktualmente ta fugitivo.
Durán i Kauffman tabata sosio den e empresa energétiko Industrias Venoco, un di e mayó distribuidónan di produktonan petrolero na Venezuela.
Ku diferensia di Durán, Kauffman a negoshá un akuerdo ku Fiskalia federal ku por otorg’é un tempu den prizòn konsiderablemente menor ku kambio di deklará su mes kulpabel.
Durán ta e úniko di e kuater detenidonan pa e kaso di maletin na Miami, ku a ninga yega na un akuerdo di kulpabilidat ku Fiskalia federal, i lo enfrentá un huisio riba su aktuashon komo agente venezolano no registrá, kuminsando 2 di sèptèmber próksimo.

Foto: Hugo Chavez 0707

Presidente di Venezuela, Hugo Chávez

Foto: Cristina Fernandez de Kirchner 2504

Presidente di Argentina, Cristina Fernández de Kirchner