WILLEMSTAD - Mester paga tinu ku e odio ku a manifestá kontra e ulandes oropeo algun siman pasá riba nos isla. Mester paga tinu tambe pa no bagatelisá e kos aki, asina ta sali na kla den un artíkulo ekstenso bou di e kabes “Blankenjacht Curaçao” ku e periodista Bert Huisjes a skibi riba e susesonan den sentro di siudat, ku a laga un siudadano hóben seriamente heridá.
Afortunadamente, e hóben aki ta rekuperando. Si t’asina, ku e tabata na aparato den hospital, entretantu a kita e aparatonan for di dje i e por funshoná riba su mes forsa. Si no surgi komplikashon, anto tur loke Carlos Moreno lo keda kuné ta sikatris di loke a sosodé.
Den e artíkulo, e outor Bert Huisjes ta deskribí kon uní selebrashon di Dia di Bandera a bai i e ta pone esaki den konteksto di loke a sosodé algun dia promé.
Vários minister a haña menasa anónimo riba nan telefon dianan promé ku e selebrashon aki.
E artíkulo ta pinta un situashon di berdadero pániko ku a surgi ora e manifestantenan a yega e sentro nokturno De Nachtwacht. E ta papia di hende ku mester a kore pa nan bida.
“E kos aki ta repudiabel. Ta un grupo di polítiko tin ku ta instigá e hendenan. Nan ta purba sembra odio i ta esaki nan ta kosechá,” asina gezaghèber di Kòrsou, Lisa Dindial a bisa.
“Nos no ta tolerá rasismo aki. Un grupo di 50 hende ta purba pone nos den un lus negativo. Nos no ta aseptá e kos aki. E parti mas grandi di pueblo tambe a reakshoná ku repudio. Den korant i na radio tambe nan a rechasá loke a pasa,” Dindial a agregá.
Minister di Hustisia ta kompletamente di akuerdo ku esaki. E grupo ku a hasi su mes kulpabel no ta representativo. Ta un grupo chikitu a laga otronan instig’é.
Di akuerdo ku e artíkulo den De Telegraaf, Helmin Wiels ta ser konsiderá esun ku ta instigá pa e tipo di aktonan asin’aki.
Den mundu komersial, nan ta tumando nota ku preokupashon pa e tono agresivo ku mas i mas por skucha den komunidat.
“E grupo ta chikitu te ainda, pero nos mester evitá ku e sosten ku e hendenan aki ta hañando ta sigui krese. Na Ulanda tambe tin un grupo chikitu ku ta papiando sumamente malu di Antia. Nan ta papia di pone nos riba wepsait pa bende nos na findishi òf pa regalá nos na Venezuela. Tur hende mester komprondé, ku esei tambe ta kontribuí na e ambiente i sintimentunan atverso ku ta reina na Kòrsou,” asina Steven Martina, durante hopi aña direktor di Aqualectra i aktualmente direktor di Fatum a deklará.
Martina ta weta e ponementu di Kòrsou bou di kuratela komo un paso importante pa nos yega na e reforma nesesario.
”Pero komo ku gobièrnu di Kòrsou tin un mayoria mínimo, e medida aki no ta konta riba un sosten amplio. Anto esei ta robes. Ora bo tin desishon importante, bo mester buska sosten mas amplio posibel. Kòrsou no tin mag di kai den man di un minoria ku ta hasi bochincha, anto ta esei a sosodé awor aki,” segun Steven Martina.
Curd Evertsz ku ta yu di Kòrsou i kende tin un kueru ku ta blanku blanku, no por kaba di komprondé loke a pasa. Nunka promé, asina el a bisa, el a hañ’é konfrontá ku un hende ku a hasi referensia na su koló.
“E kos aki no ta un kos ku yu di Kòrsou sa hasi. Anto nèt awor ku kos ta bayendo bon pa Antia. Hendenan ku bin aki, ta hendenan ku generalmente a traha masha duru i nan ta invertí aki. E loke a sosodé ta spanta hende,” el a bisa.