WILLEMSTAD – “Tur ulandes oropeo ku ke establesé su mes na Kòrsou pa mas ku seis luna, mester sigui un kurso di integrashon (“inburgering”) obligatorio. Bo ta bin aki, bo mester siña dominá nos idioma. Esnan ku ta bin ku sèn aki ta bonbiní, sobrá por keda Ulanda numa,” asina Helmin Wiels, lider di Pueblo Soberano ta bisa den un entrevista ku e korant De Telegraaf.
Manera nos ta informá den un otro artíkulo, hopi ta konsiderá Wiels komo esun ku a instigá pa e manifestashon i e aktonan di agreshon.
E aktonan di agreshon aki no ta bini di nan mes.
“E kos aki ta resultado di 300 aña di sklabitut i kolonialismo.
Nos hendenan no ta pèrmití pa bolbe kolonisá nan, pasobra ta esei ta loke ta sosodiendo awor aki. Ami ta bisa hamas!” asina Wiels a splika.
Nos pueblo, asina el a agregá, tin derechi riba outonomia. Pueblo a ekspresá su mes den e sentido ei, pero gobièrnu ta benta deseo di pueblo den ko’i sushi, segun Wiels.
“E antiano tin hopi kos pa kua e mester tin rabia. Ami ta hasi nan konsiente di esei. Loke ta pasando awor aki, ta un sorto di okupashon. Nan ta serando tur nos playanan. E playanan awor ta birando di ulandesnan ku hopi plaka i di turista. Nos mes hendenan mester paga pa por landa, esta si nan pèrmití nos drenta. Henter kosta sùit di Kòrsou ta yená ku kasnan karu, tur di ulandes oropeo.
E tipo di situashonnan aki tabatin den pasado kaba, nan a kondusí na 30 di mei 1969. Pero ta parse ku nos no ke siña,” segun Wiels.
E lider di Pueblo Soberano ta sigui bisa den e entrevista, ku De Telegraaf ku tin sumanan grandi ta bayendo pa kompanianan privá, pero no pa nos pueblo. Atrobe a kaba di duna Van der Valk e montante di 32 mion florin. Anto den tur esei, no tin plaka pa drecha nos skolnan. Turesten ministernan a subi nan mes salario ku 30 porshento, segun el a añadí.
“Nos tin hopi studiante ku ta koriendo stazje den mundu di horeka. Nan ta traha kasi pòrnada. Pa nos mes hendenan no tin lugá. Nos hendenan mester bai Ulanda bai kore stazje,” Helmin Wiels a remarká.
E dirigente polítiko a bisa ku énfasis, ku e no ta aprobá e aktonan di violensia ku a tuma lugá. Mi no ta’tei tampoko, el a agregá, indikando tambe ku e no a tende hende grita “si nos antiano no por ta na Ulanda, bosnan tampoko tin mag di t’aki”.
“Pero por ta ku a provoká e kos aki. Mi a komprondé ku tabatin ulandes ku a baha nan karson, mustra nan atras. E kos podisé na Ulanda ta normal, pero aki e no ta aseptabel. Ta un falta di rèspèt pa e antiano. Por sierto ku loke tambe ta un falta di rèspèt, ta e ulandes oropeo ku tin hopi aña ta biba aki, pero no ta papia papiamentu. Lenga di makaku, nan ta yama nos papiamentu.
Si ami haña sufisiente voto, ta bin un kurso obligatorio pa tur ulandes oropeo siña papia papiamentu si nan tin pensá di keda mas ku seis luna. Tur ulandes ku bini aki pa hasi negoshi, ta bonbiní. Sobrá por keda nan pais numa,” Helmin Wiels a añadí.