WILLEMSTAD - Direktiva di Fundashon Brasami no tin niun pia pa para ‘riba. Esei ta loke mr. Marius Römer a pronostiká relashoná ku e kaso ku ta bai kuminsá pronto den korte pa eksigí pa rehabilitá Pinedo bèk den su funshon komo direktor.
Na kuminsamentu di mei, direktiva a pone Pinedo riba non aktif, pasobra e no tabata masha kontentu pa su manera di manehá.
Tabatin keho kontra dje, ku e no por a responsabilisá sierto fondonan ku el a haña na su disposishon, ku e no tabatin un maneho transparente di duna kliente drogadikto alohamentu (tin un lista di espera, pero ta parse ku otronan ku no ta riba e lista ta drenta e instituto tòg promé) i asina tabatin vários keho mas kontra su persona.
Marcel Pinedo ta na kas, pendiente un investigashon ku ta tumando lugá. E tin dos luna kaba na kas, pero si ta kobrando su salario normalmente.
Siman pasá sinembargo, Pinedo a bin komprondé, ku direktiva di fundashon Brasami lo bolbe prolongá su estado di non aktif ku dos luna mas, pa por sigui ku e investigashon kontra su persona.
Esei mes tabata motibu, pa el a aserká su abogado pa entamá un kaso den korte. Pinedo ke pa rehabilit’é komo direktor di Brasami i pa limpia su nòmber di tur e akusashon i insinuashonnan ku tin ta kore den komunidat.
Abogado Marius Römer a rekonosé, ku den promé instansia tabatin un kibokashon, kaminda mester a entamá e kaso, pero ku esei entretantu ta remediá i ku dia 14 di yüli awor e kaso ta sirbi.
Mi ta hopi optimista. Si mi analisá e akusashonnan kontra mi kliente, mi ta yega na e konklushon, ku nan no tin pia pa para’riba. No tin nada konkreto pa akusá mi kliente di dje,” asina Römer a sigurá.
El a bisa, ku e lo proba esei tambe durante tratamentu di e kaso otro siman djaluna.
E kaso di Marcel Pinedo ta un dje kasonan, kaminda a pone un persona den un posishon ehekutivo riba non aktif.
Tin entre otro e kaso di e direktor interino di fundashon Tayer Santa Martha, el a sosodé den kuerpo polisial i tin e kaso pendiente di direktornan di Fundashon Kas Popular
E kaso di Victor Monk ku direktiva di Bureau Ziektekostenvoorzieningen (BZV) ta konosí, kaminda a pon’é riba non aktif, pero kende a bringa su kaso éksitosamente den korte. Direktiva di BZV sinembargo a apelá e kaso.
Resientemente e miembro di Konseho Insular pa frakshon di MAN Eugene Cleopa a hasi pregunta riba e asuntu aki i a indiká di ke sa, di kon tin asina tantu hende ku a pone riba non aktif últimamente.