E tabata un simpel selebrashon ku a hasi algun mucha i mi mes hopi kontentu. Pero selebrando e ech, ku tur e muchanan ku ta lesa djadumingu atardi den Bright World Park a bai over, tabata algu ku sin mas mester a sosodé.
Bon mirá, no tabatin motibu pa hasi algu èkstra pa aksentuá logro di un aña di bai skol di spesífikamente e muchanan aki. Pero den un pais kaminda muchu biaha ta parse ku ta esnan ku no logra ta haña tur atenshon i kuido, ta na su lugá pa laga delaster un hende ku hasi un esfuerso eksitoso sa ku esei ta algu di balorá. I ku éksito ta algu ku mester kontinuá.

Mester ta asina, ku kada hóben ku ta bai skol i ku por, sa ku e ta hasi esaki pa ékselá. Pa logra ku e por ta kontentu ku su mes. Ku e ta preparando su mes pa den futuro e por ta mas mihó posibel. E mucha mes lógikamente no por yuda su kurpa pa loke ta insentivo i oportunidatnan pa (sigui) motiv’é pa e bai skol. E mucha ta dependé di adultonan konsiente rondó di dje pa esaki sosodé.
I sigur sigur no por laga esaki den man di henter e instituto di enseñansa lokal, ku tur su kosnan ku por diskutí, pa hinka ambishon den e hóben. Tin asina tantu mayor ku ke pa nan yu haña mihó skol posibel, pero pa tantísimo rason nan mes no ta/por yuda e yu. Un rason sin mas ta falta di sufisiente sèn pa e mayor por paga, komo kliente, pa su yu haña bon skol. Ke men di bèrdat ku ta esun ku por paga, ta esun tambe ku ta haña mihó skol.

Pa bin bèk riba motivashon pa nos hóbennan ta realidat ku ta keda serka mayornan i esun ku ta kuida e mucha mes pa hinka den e mucha e rason pa e ke bai skol. Pa e haña dushi ku e por bai skol i siña. Ta mayornan mes hopi biaha ta esnan ku ta motivá un mucha ku un 6 tambe ta bon. Mayornan ta esnan ku ta bisa e mucha, ku baimentu di skol i siñamentu muchu por/ta kans’é. Ta mayornan ta bisa dilanti di e mucha ku su kapasidat bon mirá no ta mashá. I ta mayornan ta pèrmití ku e sistema di enseñansa ku nos tin, no ta saka tur bon ku tin den muchanan.
Mi ta floho di kere, ku nos komunidat su nivel di inteligensia general ta ofisialmente asina abou. Ku te ainda ta un grupo di hende so por bai i kaba e nivel di skol di mas haltu. I ku di bèrdat ta nesesario pa sigui baha nivel di skol en bes di obligá muchanan pa nan buska pa ta mihó.

Miéntras ku tur hende ku ke por sigui hasi den nos enseñansa loke nan ke, bo ta keda ku e realidat ku muchanan no ta mas bon posibel, pero ta keda lora den ‘basta bon’ te mas abou, pa programá nan futuro di tal manera, ku e mucha nunka no ta mira te p’e komprondé, dikon e mester hasi esfuerso. Mal programá mente di hende ta un akto kriminal ku no ta benefisiá den niun forma un futuro Pais Kòrsou.
Sigur no mester ta den man di inisiativanan partikular komersial pa hasi e diferensia ku nos pais mester, ke men den ofresé kliente (mayor/alumno) bon enseñansa (servisio).

Turesten den e fakansi aki tin mayor ku no ta komprondé te pa nan realisá ku ta nan mes tin futuro di nan yu den nan man. Tin e situashon kaminda a pone ku mayornan ku no sa mihó ta man na kabes òf ta asta desesperá, pa e echo ku nan no sa kon ta sigui ku nan yu. Esaki miéntras ku muchu tiki mayor si por i ta tuma bon desishon pa garantisá ku nan yu su futuro ta basá riba bon edukashon.
Den kaso di sòru pa bon edukashon di bo yu tambe ta konta ku esun ku ke por.

Bon siman i lesa mi blòg riba www.notabel.com.
Por komuniká ku Reyna Joe na info@notabel.com.